Lávvordaga almmuhuvvo muitobázzi Pavla Konkova buori muitun Lujávrris Guoládatnjárggas Sámis. Dan ledje guhká vuordán olbmot.
Lávvordaga almmuhuvvo muitobázzi Pavla Konkova buori muitun Lujávrris Guoládatnjárggas Sámis. Dan ledje guhká vuordán olbmot.
Pavla Konkova lei dovddus juoigi gii orui Lujávrris Guoládatnjárggas. Son lei oahpis dán bealde rájá dan oktavuođas go beakkán sámi artista Mari Boine iežas konsearttain lávii lávlut «Moddjás Katrin» lávlaga mii lei álggos luohti man Pavla Konkova lei juogán vuos ovdal Mari Boine. Ieš Mari ná muittaša dili go oahpásmuvai Pavla Konkova «Moddjás Katrin» luohtái.
Mari Boine konsearttas Lujávrris Guoládaga Sámi Radio almmolaš rahpama oktavuođas geasset 2005:s. Govven: BarentsObserver.com
– Mun vuosttaš háve gullen dán nuohta ovtta skearrus man muhtun Finnmárkku nisu lei ožžon go finai Ruošša bealde. Ráhkásmuvven oalát dien nuhttii. «Moddjás Katrin» lea okta mu fiidnámus nuohtain, ja olbmot miehtá máilmmi liikojit dasa, muitala Mari Boine.
Pavla Konkova juoiggai ja lávllui 54 jagi ovdal go su eallingeaidnu bisánii 2012:s. Juoigi lei 76 jagi boaris go jámii.
Lávvordaga golggotmánu 10. beaivvi sápmelaččaide ja Lujávrri gili ássiide lea earenoamáš beaivi go Pavla Konkova buorren muitun almmuhuvvo muittobázzi. Illudeddjiid searvvis lea maiddái Alla Vasiljeva Jelle, sámelávlunjoavkku miellahttu.
Alla Vasiljeva. Priváhtagovva.
– Pavla Konkova lea min sámi gollejietna. Udju, smáđáhkes barggánis nisu. Álo lei bargguid siste, álo doaimmat ledje sus, ii goassige dadjan bahás sániid nuppi olbmo birra. Hui fiidnát lávllui, muittaša Alla Vasiljeva.
Mari Boinii lea maiddái illudahtti go gudnejahttet Pavla.
– In deaivvadan Pavlain ovdal go čuojahin Lujávrris. Dalle bovdejin vel su lávddi ala. Leamašan somá illudahttit Ruošša beale sámi oappáid ja vieljaid dieinna luđiin, dovddan sii leat hui rámis dainna. Lea duođaid somá gullat go Pavla gudnejahtto, juohká iežas dovdduid artista.
Buohkat serve ruhtadeapmái
Lei Murmánskka guovllu sámiid searvi (OOSMO) ovttas dábálaš Guoládatnjárgga ássiiguin čoaggán ruđaid Pavla Konkova muitobázzái.
– Bearrašis ii leat dieđus nu ollu ruhta, danin sámeservodaga ássit ja sámiid searvi fárrolaga čogge ruđaid muitobázzái. Lea dehálaš maŋisbohttiide fievrridit muittu Pavla Konkova birra, muitala Alla Vasiljeva.
Maŋŋá muitobácci almmolaš almmuheami Lujávrri čearddalaškulturguovddážis dollojuvvo Pavla Konkova muitokonsearta «Duoddara jietna».
