Øyvind Setnesas muittuhus dutnje gii it jáddat juovlanásti go manat nohkkat.
Badjel 100 jagi lea gildon diktit juovlanásti ja eará juovlačuovggaid báitit ija miehtá. Dološmállet čuovgapearat mat jođanit liegganit leat dávja leamaš sivvan buollimiidda áiggiid čađa. Muhto dála čuovgapearat gal leat áibbas earalaganat.
– Dála LED-teknologiijain eai lieggan čuovgapearat láhkka ge nie jođanit go ovdalašáigge. Dat mearkkaša ahte buollinsihkkarvuohta dál lea olu buoret ja ahte čuovgapearat eai bullet šat nu dávja go ovdal, čilge Tryg Forsikring Øyvind Setnes preassadieđahusas.
Eambbo buollimat go olbmot leat ruovttuin
Olbmot govvidit juovllaid muohtagáhtaiguin ja juovlanástiiguin mat heaŋgajit lásin. Muhto dán govás lea maid duogábealli, mii váldit stuorat risikoa.
– Statistihkat čájehit ahte buollimat gevvet eambbo go olbmot leat ruovttuin. Juovlamánu lea buot galbmaseamos, ja ferte ligget viesu. Go olbmot leat viesuin lea stuorat risikoa ahte buoláska. Dasa lassin cáhkkehallet olbmot ginttaliid ja dahket dola ommánii, dadjá Setnes.
Lonut boares juovlačuovggaid
Dán áigahaš LED-čuovgapeara lea hui buorre ovdáneapmi go eai lieggan nu jođanit. Jus dus lea boares juovlačuovga maid heŋget juohke jagi, de ávžžuhuvvo ahte lonuhat dan eret.
– Olmmoš rádjá áinnas juovlačuovggaid maŋŋel juovllaid, maid fas ohccala jagi maŋŋel. Rávdnjefievrradeaddjit sáhttet máhccasit ja pearat sáhttet billahuvvat. Go de fas ohccala daid jagi maŋŋel sáhttet dat billahuvvan nu ahte ii dieđe ge, čilge Setnes.
Vaikko dála LED-čuovgapearat leat buorebut go dološmállet pearat, de dat ii mearkkaš ahte sáhtat oalat vajálduhttet ahte dus leat juovlačuovggat ja diktit daid báitit jándorviissaid.
– Ii, fertešii aŋkke bidjat vierrun jáddadit juovlačuovggaid go manna nohkkat dahje go ii leat ruovttus, loahpaha son.
