Romssa ja Finnmárkku fylkka guovddášhálddahusa bargoveaga jođiheaddji, Trond Magne Henriksen, lea sádden mediai fáktádieđuid geardduhan dihtii maid Finnmárkku álbmot duođaid jienastii miessemánu 2018 álbmotjienasteamis galgá go Finnmárkku fylka oktiičaskojuvvot Romssa fylkkain vai ii.
Trond Magne Henriksen, gii lei Finnmárkku fylkkagieldda gulahallanhoavda 2018:s, ja 2018 fylkkaválggastivrra čálli Harald Hereide čálliba ahte jagi 2018 miessemánus lágiduvvui álbmotjienasteapmi Finnmárkkus Romssa fylkka oktiičaskima birra.
– Álbmotjienasteapmi lea namuhuvvon iešguđetlágan mediain ja lea dárbu geardduhit fáktá dahje mii dáhpáhuvai, čálliba Henriksen guovttos Hereidein preassadieđáhusas. Henriksen lea dál Romssa ja Finnmárkku fylkka guovddášhálddahusa jođiheaddji.
Dát dáhpáhuvai 2018 álbmotjienasteami oktavuođas
Lei Finnmárkku fylkkadiggi mii seamma jagi, jagi 2018, mearridii ahte álbmotjienasteapmi galgá lágiduvvot ovdal miessemánu 17. beaivvi buot gielddain Finnmárkkus.
Álbmotjienasteapmi čađahuvvui sihke elektronalaš vugiin ja dábálaš vugiin jienastanlanjain (eai lean nu olu lanjat go dábálaččat). Finnmárkku fylkkagielda mávssii gielddaid válgagoluid.
Finnmárkkus ledje 59 625 olbmos boarrásabbot go 18 jagi jienastanvuoigatvuohta.
Oktiibuot jienastedje 34 824 olbmo. Válgaoassálastinproseanta lei 58,4 proseantta galgá go Finnmárku fylka časkojuvvot oktii Romssa fylkkain.
Jienasteami boađus čájehii ahte 87,0 proseantta lohke «ii», 12,3 proseantta lohke «juo», 0,7 proseantta jienastedje guoros jienain.
14 gielddas Finnmárkku gielddain jienastii 90 proseantta álbmogis ahte ii galgga Finnmárkku fylkka časkit oktii Romssa fylkkain.
30 304 jienastedje «ii», 4 298 jienastedje «juo», 222 ledje guoros jiena. Dat mearkkaša ahte vaikko buohkat geain lei jienastanvuoigatvuohta livčče jienastan «juo», de livčče dattetge šaddan ii-eanetlohku.
Finnmárkku fylkaválgastivra dohkkehii álbmotjienasteami 2018 miessemánu 25. beaivvi.
