Logut čájehit ahte 4 juohke logát olmmoš vajálduhttejit jorahit čáskadanapparáhta. Dát dagaha ahte čáskadanapparáhta sisdoallu čoaltu ja garrá, dán čájehit iskosat. Dat mielddisbuktá ahte apparáhta ii doaimma dahje doaibmá hejot.
Sihkkarvuođadihte berrejit dálueaiggádat jorahit čáskadanapparáhta vulosoivviid juohke kvartálas, dahje jahkebealis. Dasa lassin fertet iskat lea go deattaindikáhtora njuolla ruoná mearkka alde ja ahte plomberen riekkis lea ain ollis.
– Bija beallji apparáhta vuostá ja guldal gullo go doppe mihkke, dadjá IF dáhkádusfitnodaga buollininšenevra Anders R. Ellingbø.
– Hehttemis ahte čáskadanapparáhta ii suođa, de fertet váruhit ahte sihkkarisvuođariekkis lea sajis. Soarpačáskadanapparáhta ii dárbbaš vulosoivviid jorahit, dadjá Ellingbø.
Ávžžuhit iskat
Iskosat čájehit maid ahte ovccis juohke logát norgalaččas lea čáskadanapparáhtta ruovttus. Guovttis juohke logádis lohket sis leat čáhcešláŋgat.
– Dat lea gáibádus ahte juohke viesus galgá okta manuála čáskadanapparáhtta, vai lea vejolaš čáskkadit buollima. čáhcešláŋga dahje čáskadanapparáhtta mas lea unnimus 21A effeakta ja mii lea unnimus 6 lihtter, dadjá buollinsuodjalussearvvi direktevra Rolf Søtorp.
– Dasalassin galgá leat okta suovvanjurggon juohke gearddis viesus. Vaikke láhka ii gáibit dan, de oaivvildit mii ahte livčče galgat okta čáskadanapparáhtta maid juohke gearddis viesus, erenomáš lanjain mat lea čadnon gievkkanii ja váldooađđinlatnjii, dadjá Søtorp.
Hárjehallet ruovttus
IF dáhkádusfitnodaga buollininšenevra, Anders R. Ellingbø, lea ovttaoaivilis Søtorp:in ja lohká čáskadanapparáhtat berrejit leat sadjosis buohkaide ja olbmot fertejit oahppat mo dat doibmet. Son maid ávžžuha olbmuid čađahit buollinhárjehallama, oroš go dábáláš viesus dahje blohkkaviesus.
– Jus hárjehallá, de diehtá maid galgá bargat jus heahti šaddá, dadjá Ellingbø.
