MUITTAŠANBEAIVI – 4 jagi áigi

Sihke Kárášjogas, Álttás, Oslos ja eará báikkiin lágidit odne muittašan deaivvademiid čalmmustahttin dihtii dan ilgadis dáhpáhusa mii dáhpáhuvai 2011:s Utøyas Mátta-Norggas, go olgešekstrema Anders Behring Breivik oaguhii ja gottii 77 olbmo ja bijai bombba ráđđehusviesuid lahka, mii gotti gávcci olbmo. Loga Norgga stáhtaministtara sártni áššis.

Kárášjogas

Kárášjoga gielda lea almmuhan iežaset neahttasiiddus ahte odne diibmu 18:00 lea sis suoidnemánu 22. beaivvi čalmmusteapmi. Utøya sullos ledje 12 Kárášjoga nuorat ja danne oidne ge dárbbu lágidit dakkár čalmmusteami Kárášjogas vai nuorat besset hupmat dán dáhpáhusa birra. Buot Kárášjoga nuorat máhcce heakkas ruoktot.

— Lea vuosttaš geardde go Kárášjoga gielda čalmmustahttá dán beaivvi. Eará báikkiin eai máhccan buot nuorat heakkas ruoktot. Lea lunddolaš čájehit morraša ja álki dan čalmmustahttit. Ii leat nu álki fuomášit ahte ferte maid čalmmustahttit dan beaivvi vai sii geat báhce dearvan, besset muittašit ja hállat dan birra. Nuorat leatge váillahan beaivvi čalmmustahttima, lohká doarjjajoavkku miellahttu Monika Anti Kárášjogas.

Sánit eallima ektui

Girječálli Inga Ravna Eira galgá lohkát divttaid doaluin. Eira lohká son oaidná stuorra gudnin go sus jerre, sáhtášii go son divttaid lohkat dáid doaluin.

 – Dovddan viehka stuorra ovdasvástádusa leahkit doppe go dieđán man issoras dáhpáhusa nuorat vásihedje. Nuorat leat báhčaluvvon, deaivvahallan ja baluin báhtaran ja áidna sadji gosa sáhtte báhtarit, lei čáhcái. Ii leat leaika maid sii leat vásihan. Mii eat galgga vajáldahttit dán beaivvi, eatge badjelgeahččat dan. Mii galgat váldit duohtan dan beaivvi. Mii fertet muitit dát nuorat leat massán lagas skihpáriid ja oahppásiid. Mii geat eat leat vásihan dan maid dát nuorat leat vásihan, eat mii sáhte áddet maid sii leat vásihan, muhto mii sáhttit geahččalit áddet ja váldit vára dáid nuorain, deattuha Inga Ravna Eira. 

^{_{Inga Ravna Eira}}

Hávit maid leat váttis dikšut

Oaivegávpogis leat maid muittošeame ja čalmmustahttime dan dáhpáhusa. Norgga stáhtaministtar, Erna Solberg doalai sártni ja logai álbmot galgá čajehit beroštumi, vuollegašvuođa ja miehtamiela sidjiide geat masse iežat lagamusaid njeallje jagi áigi.

^{_{Norgga stáhtaministtar, Erna Solberg. Šearbmagovva VG.no}}

­— Suoidnemánu 22.beaivi boahtá álo leat sevdnjes beaivi Norgga historjjás. Dat beaivi lei katastrofa, dan beaivvi šattai Utøya ja ráđđehuskvartála oaffar bahás daguide. Dan beaivvi masse 77 vigiheames olbmo iežaset heakka. Nuorat ja rávis olbmot. Bearašmiellahtut geat eai goasse ge šat boahtán ruoktot. Mánát, mánáidmánát, váhnemat, oappát, vieljat, eamidat, isidat, moarsit, irggit, ránnját, olbmát ja bargoskihpárat.

Njeallje jagi maŋŋel dan ilgadis beaivvi leat mii das ovttas dinguin geat lehpet massán dan divrasepmosa mii dis lei. Mii muittašit ráhkisvuođain sin geat gottáhalle ja mii eat galgga vajálduhttit. 77 olbmo masse heakka, ja oapmahaččaid eallimat rivde oalát. Bearrašat ja olbmát ellet váillahemiin. Sii geat roasmmahuvve ja gádjo heakka geahččalit rievdadit iežaset árgabeaivvi dábálaččain fas. Moraš ja váillaheapmi ii boađe goasse jávkat. Suoidnemánu 22.beaivi rahkadii háviid maid lea váttis dikšut. Mun in sáhte lohkat ahte mii ipmirdit, go mun doaivvun ahte dušše sii geat leat vásihan massit sin nieidda, bártni, oappá dahje viellja duođai ipmirdit man bávččas dat lea. Muhto mii geahččalit ipmirdit, mii geahččalit čájehit beroštumi, vuollegašvuođa ja miehtemiela.(…)

Odne mii rahpat suoidnemánu 22.beaivvi-guovddáča (22.juli-senteret). Dáppe mii galgat rehálaččat muitalit mii dahpahuvai. Sierra muittašanlátnjá gudnejahttin dihtii sin geat masse heakka. Guovddáš galgá juohkit dieđuid nu ahte dakkár dáhpáhusat eai šat dáhpáhuva. Mii galgat šaddat diđolažžan movt sáhttá hehttet vašuheami, veahkaváldima ja terrorisma. Dan mii dahkat 77 nuoraid ja rávis olbmuid dihtii geat masse heakka njeallje jagi áigi.