Guovdageainnu Historjasearvvi jođiheaddji Nils Johan Heatta muittaša dás Johan Mathis K. Hætta.
Guovdageainnu Historjasearvvi ovddeš jođiheaddji, Johan Mathis K. Hætta dahje Tráktor Máhtte, fárrii eret dán máilmmis juovlamánu 12. beaivvi. Son leai riegádan 1931:s ja čakčamánu 10. beaivvi devddii son 90 jagi.
Máhtte leai jierbmás, viššalis ja čeahpes olmmái. Go penšunistan šattai, de son čálligođii iežas eallinvásáhusaid birra ja son beroštišgođii báikki historjjás. Čálistii girjjáža mas son muitalii dan áiggi birra go son vujii gálvoráiddu buldosáriin Guovdageainnus Áltái. Máhtte leai historjasearvvi ovdaolmmoš ja girjji redaktevra go girji eváhkkoáiggi birra almmuhuvvui 2013:s. Son čálii ollu eará nai čállosiid mat eai almmuhuvvon girjin, muhto main lea stuora historjjálaš árvu: Hætta-soga birra, sámi buddestatnamaid birra Guovdageainnus jnv.
Guovdageainnu Historjasearvvi Jahkegirjjis 2020 son dovddahii ilu go historjasearvi fas doaibmagođii ja go ođđa girji fas galggai ráhkaduvvot. Máhtte muitalii iežas mánnán juo leamaš viššalin lohkat áviissaid ja girjjiid ja geahččat govaid. 1980-jagiid loahpas Máhtte fáhtehalai buozanvuhtii. Son leai meahcis go fáhkkestaga olles olgešbealli rupmašis gálnnai ja son massii giela. Máŋga jagi golle ovdal go beasai fas hoalddaide ja de son fas beasai čálligoahtit viššalit. Eadnásis son árvalii iežas šaddan diehtoáŋgirin ja son beroštii lohkat measta buot maid oaččui gieđaid gaskii.
Máhtte válddii vára dološ dávviriin ja bargobiergasiin. Son leai daid heŋgon áiteseaidnái ja leai viššal čájehallat ja muitalit masa dat ledje adnon ja mo. Son leai bajásšaddan dan áiggis go diet bargoreaiddut ledje anus. Muhto son leai čađat gárvvis lávket ođđa áigái ja váldit atnui ođđa áiggi vejolašvuođaid ja reaidduid. Nu go dalle go olbmot Guovdageainnus guođđigohte heastaáiggi ja háhkagohte tráktoriid. Máhtte álggii vuodjit suohkana vuosttaš eanadoallotráktora go leai 20-jahkásaš ja dainna son de oaččuige dan nama mainna buohkat su dovde: Tráktor Máhtte. Dat dáiddii ge leat leamaš álgu su eallimii mašiinnaiguin ja mašiidnafitnodateaiggádin.
Njeallje jagi áigi jámii su eamit Biret Ánne, geainna son leai leamaš náitosis 1957 rájes. Dan son moraštii sakka. Máhtes ja Biret Ánnes leat njeallje máná geat buohkat leat rávisolbmot ja geain leat iežaset bearrašat.
Guovdageainnu Historjásearvi giitá Tráktor-Máhte buot áŋgiruššamiid ovddas, buorrin sihke min searvái ja Guovdageainnu servvodahkii.
Guovdageainnu Historjasearvvi jođiheaddji Nils Johan Heatta
