Deháleamos su dáistalemiin lei ahte earát eai galgga dan seamma go son dárbbašit vásihit.
Dag riegádii Bergenis ja bajásšattadettiin orui earret eará Sálašvákkis, Stanges, Sáččás ja Málatvuomis. Dan áigge go orui Málatvuomis šadde Tor Nymo ja su bearaš buorit ustibat sus. Alddán mus lei ge dat stuora illu ahte bessen bagadallat Dag go barggai váldofágabargguin davviriikkalaš gielain Tromssa universitehtas.
Váldofágačállosa, mainna gearggai 2005 čavčča, tittel lei «Ei samanlikning av kvinnenamn i Lofoten (Buksnes) med Indre Troms (Målselv og Bardu) på 1800-talet.» Dat lei buorre ja vuđolaš bargu ja čállosis nákcii son čalmmustahttit miellagiddevaš nammaerohusaid Siskkit-Tromssas ja Lofuohtas.
Maŋŋel cand.philol.-eksámena, man fágasuorggis ledje davviriikkalaš gielaid váldofága, historjá gaskafága ja geografiija vuođđofága virgáduvvui son universitehtalektoriin UIT teknologiija ja sihkarvuođa instituhttii. Doppe son oahpahii eanemusat praktihkalaš dárogiela.
2010:s náitalii son Biret Ándde Bireha ja Ánne Kirstte Lemeha Elliin (Ellen Fredeng). Gesiid soai leigga dávjá Kárášjogas, gilis gos su eamit lea bajásšaddan.
Astoáiggis lei son mielde valáštallamis ja earenoamážit beroštii volleyballas. Son lei Ballklubb Tromsø stivrajođiheaddji 2008-2010.
2009 geasi lei dáhpáhus mii oalát rievdadii su eallima. Dag lei Davvi-Norgga Universitehtabuohcceviesus (UNN) iskkadeamen lea go sus sáhppegeađgi. Doavttir geažuhii ahte dat soaitá leat borasdávda, ja go son viimmat beasai iskkadeapmái UNN urologa lusa, de čájehuvvui ahte sus lea borasdávda ovdarávssás.
Dan geažil go lei leamašan moivi vuordinlisttuiguin, de ii gohččojuvvon Dag UNN:i ovdal go lei olles jahki gollan. Ledje oktiibuot 450 pasieantta geat eai lean gohččojuvvon rievttes áigái UNN:i. Dag dáfus čájehuvvui de ahte borasdávda lei viidádan lymfarávssáide. Dan geažil go dávda lei nu guhkás mannan, de gáibidii Dag beassat iskkadeapmái Radiumhospitálii Osloi.
Dalle go son lei Radiumhospitálas ráhkadii NRK reportáša Dag ja su borasdávdaášši birra. Dan beaivvi lei dat vuosttaš áššin Kveldsnytt sáddagis. Dag válljii váidit UNN ja váiddii maid institušuvnna politiijaide. Son ii vuollánan ja su áššiin barge iešguđet institušuvnnat, earret eará Davvi Dearvvašvuohta, Stáhta dearvvašvuođabearráigeahčču, Norgga pasieantavahátbuhtadus ja Pasieantavahátlávdegoddi. Manai nu guhkás ahte Dag, su advokáhta rávvagiid mielde, ceggii ášši stáhta vuostá.
2015:s ovdalaš go diggeášši galggai álgit geassádii Stáhta diggeáššis dan geažil go Pasieantavahátlávdegoddi loahpas mieđihii ahte Rørbakk lei ožžon bissovaš vahága buohcceviesu meaddima geažil. Áššedovdi čálii namalasii ahte Rørbakk oaččui mealgát heajut prognosa go livččii ožžon jus livččii árabut iskkadeapmái beassan UNN:i. Maŋŋel viđa jagi dáistaleami vuittii son viimmat ja oaččui buhtadusgáibádusas. Dan áigge lei son dávjá medias, ja son deattuhii ahte deháleamos sutnje dáinna dáistalemiin lea leamašan ahte earát eai galgga vásihit dan seamma go son.
Mus lei dat illu ahte mus lei olu jagiid oktavuohta Daniin, juo 1980-jagiid rájes. Go son buozalmasvuođa geažil šattai luohpat universitehtalektorin, de deaivvadeimmet dávjá káfestallanboddui Jektas. Son muitalii dalle earret eará daid iešguđetlágán borasdávdadivššuid birra maid lei ožžon. Vaikko lei buozas, de ledje sus olu čuvges bealit eallimis, ja dat deháleamos lei eallin ovttas su Eliin.
Mu jurdagat leat Elle ja su eará lagamuččaid luhtte.
