Fylkkaráđijođiheaddji Bjørn Inge Mo vádjolii sotnabeaičuovganeapmái suoidnemánu 10.b.
Lei šohka ja moraš go mii sotnabeaivve suoidnemánu 10. beaivvi oaččuimet dan lossa dieđu ahte Romssa ja Finnmárkku fylkkaráđđejođiheaddji lei vádjolan, dušše 54 jagi boarisin. Dán dieđu man mii ádjánit váldit badjelasamet go mii geat dovddaimet su ja leimmet lagas ovttasbargoguoimmit Bjørn Ingiin, mis lea lossa áigi dál.
Romssa ja Finnmárkku fylkkaráđđejođiheaddji Bjørn Inge Mo, lei bázzi davvinorgga politihkalaš máilmmis. Okta guhte lei álo gearggus ovdanbuktit dehálaš áššiid fylkka ja riikaoasi bealis, ja sus lei álo áigi deaivvadit buohkaiguin geat háliidedje suinna leat sáhkalagaid. Bjørn Inge guldalii olbmuid ságaid, ja attii buori rávvagiid. Bjørn Inge oinnii álo olbmo vuosttažin, leaččai go nuorra dahje boaris, beroškeahttá ámmáhis dahje vearrodieđuin.
Bjørn Inge politihkalaš doaibma ii lean dušše čoahkkinlanjas ja kantuvrras. Son ráhkistii leat ovttas olbmuiguin, divaštallat, guldalit, háhkat ođđa máhtu ja váldit mielde vásáhusaid ja oahpu hábmedettiin ođđa politihka.
Beroškeahttá dievva kaleandaris lei álki fylkkaráđđejođiheaddji Bjørn Inge Mo:ain beassat ságastallat. Son gávnnai áiggi, ja nu son háliidii ahte galggai leat.
Bjørn Inge Mo lei buiga luohttámušolmmoš. Gáivuona sátnejođiheaddji 12 jagi, Romssa Bargiidbellodaga jođiheaddji 9 jagi, Sámediggeáirras, Bargiidbellodaga guovddášstivra miellahttu, fylkkadiggeáirras ja maiddái Romssa ja Finnmárkku fylkkaráđđejođiheaddji daid maŋemuš jagiid.
Bjørn Inge ii goassege bidjan iežas ovddemussii. Son lei gaskaneassoahpamuš measttir, ja lei dan dihte eará lágan go báikkálaš ja regionála politihkarat. Son sáhtii fuobmát buori soabadanvugiid, gávdnat vejolašvuođaid ja nákcii čoavdit čoavddekeahtes politihkalaš čuolmmaid. Son dávjá dajai “nákcet šaddat ovtta oaivilii” ja “nákcet dahkat dan”.
Go politihkalaš sierramielalašvuohta šattai váttisin, ohcaleimmet čovdosiid Bjørn Inges. Go lei sáhka buori ránnjávuođain min ránnjáfylkkain, lagas ovttasráđiid min ránnjáriikkain, dahje stuorat ja smávit báikegottiin davvin oassin Norggas ja Sámis. Su politihkas lei su váimmus lagamusas lagas ja buorre ovttasbargu sámi ja kvena servvodagain.
Dehálaš lei maiddái su stuorra beroštupmi ovddidit nuoraid. Son válddii nuoraid ja nuorra politihkkariid duođalaččat, son attii sidjiide ságastallanáiggi ja son rávvii ja bagadalai sin, muhto deháleamos – son guldalii sin. “Mii fertet loktet nuoraid”, dajai son dávjá máŋgga oktavuođain. Son ii lokten ráidalasa bajás iežas maŋis, muhto niejai vulos ja loktii veahkehan dihte nuoraid goargŋut.
Maŋŋel go lei deaivvadan Bjørn Inge Mo:ain, de olmmoš muitá su moji ja buori movtta, buori dadjalemiid ja su liekkus boagusteami. Son dollii alo oalgái nuppi ja dadjalii movttegit juoidá manadettiin.
Buot deháleamos– Bjørn Inge ávžžuhii alo beroštit olbmuin geat leat min birra, nugo min lagamuččain ja sin geain mii ráhkistat. Mu deháleamos rávva man ožžon Bjørn Inges lea: Biso iežat joavkku luhtte. Sus lei alo áigi háleštit ja dávjá son riŋgestii dušše háleštit vaikko man birra. Mii ferte buohkat geahččalit leat seamma buorit min lagamuččaguin go Bjørn Inge lei.
Romssa ja Finnmárkku fylkkagielda lea massán buori bargoguoimmi ja allaárvosaš jođiheaddji. Dál mannet min jurdagat vuosttamužžan Bjørn Inge bearrašii geain son beroštii hui ollu, ja geaid birra alo hálai ráhkisvuođain.
Ráfi lehkos Bjørn Inge muitui.
