Finnmárkkus leat nu unnán rievssahat báhččon bivddus ahte Finnmárkkuopmodat (FeFo) lea ferten gieldit rievssatbivddu muhtun guovlluin.
Ávvir lea čállán dán jagáš ealgabivddu birra go FeFo ii lean duđavaš loguiguin. Dál dieđiha FeFo ahte rievssatbivddus maid lea heajos buvttadeapmi. Einar Asbjørnsen, FeFo meahcceossodaga jođiheaddji, muitala ahte lea 14 proseanttain njiedjan rievssatnjeaidin diimmá rájes:
– Rievssatbivdu duođašta máŋgga láhkai tákserenbohtosiid mat bohte borgemánus. Dán jagi leat báhččon gaskal 8000 ja 9000 rievssaha, mii lea 14 proseantta unnit go diibmá. Dat lea unnán. Mii leat ferten gáržžidit beaive- ja áigodateriid, muitala Asbjørnsen.
Preassadieđáhusas čállá FeFo ahte leat 8338 rievssaha ja 2974 girona dieđihuvvon báhččon Finnmárkkuopmodagas.
– Jursieallit jápme dego čurohat
Einar Asbjørnsen muitala ahte sivva manne rievssatnjeaidin lea njiedjan, sáhttá leat danne go jursinálli lea nohkan dálvvi mielde, muhto manne dat leat nohkan, dan son ii dieđe.
– Mii oaidnit čatnosa dainna go jursinállelohku lea njiedjan dálvvi mielde. Dat jápmigohte áibbas fáhkka dego čurohat. Olu muohttaga eat jáhke leat sivvan go leat nohkan, danne go muohta doaibmá dego govččasin smávva elliide mat orrot muohttaga vuolde, čilge Asbjørnsen ja joatká:
– UiT lea dutkan dan ja buktán midjiide dieđuid das ahte go jursieallit nohket, de fertejit smávvanávddit, nu go riebanat, gávdnat eará borramuša. Dat lea garrasit váikkuhan lottiide mat lállet eatnama alde.
Eará sivva manne rievssatnjeaidin lea njiedjan, dadjá Asbjørnsen sáhttit leat guhkes giđa:
– Dán jagi lei giđđa maŋŋit ja guhkki, ja galbma ja maŋŋonan giđđa ii leat buorre lottiide go lállet.
Jursi lea sáhpánjoavkku elliid oktasašnamahus. Dárogillii: smågnagere.
Gidden 33 bivdobáikki
FeFo lea gáržžidan bivddu bivdiide geat bohtet olggobealde Finnmárkku. Tákserenbohtosiid maŋŋel, mat bohte borgemánus, vuvde unnit bivdinkoarttaid olggobeale bivdiide.
– Dasa lassin leat 33/136 bivdobáikki oalát gidden bivdiide geat bohtet olggobealde Finnmárkku deike bivdit, vai sihkkarastit ahte báikkálaš olbmuin maid lea juoga bivdit. Dan gáržžideami doalahat olles bivdoáigodaga, muitala Asbjørnsen.
Bivdu nohkan
Meahcceossodaga jođiheaddji dadjá dál lea eanaš bivdu nohkan, ja lassána fas njukčamánu rájes go beaivváš fas ihtá.
– Eanaš bivdu láve čakčamánus. Dál meroštallat ahte 90 proseantta bivddus lea nohkan. Dábálaččat lea unnán bivdu dás ovddos guvlui gitta njukčamánnui, ja dat bivdu mii dál ain lea, lea smávvafuođđobivdu, čilge Asbjørnsen.
