Bearjadat maŋŋelgaskabeaivvi oaččui Romssa suohkan dieđu njoammuma birra.
Ovtta analysas, mii lea váldon positiiva koronaiskkosis lea čájehuvvon eaŋgalas muhttašuvvan virus.
Muhttašuvvan virus mii njoammu jođáneappot ii leat ovdal duođaštuvvon Romssas ja olmmoš geas virus lea duođaštuvvon bođii girdiin Romsii gaskamuttos ođđajagemánu.
Romssa njoammuneastadan doavttir Trond Brattland čállá preassadieđáhusas ahte olmmoš lei leamaš reaissus muhtin «rukses riikkas».
– Son lei erremis logi beaivvi ja moadde beaivvi maŋŋel go bođii ruoktot de válddii koronaiskkosa mii lei positiiva. Iskkos sáddejuvvui analysii ja bearjadaga bođii diehtu ahte lea sáhka dan muhttašuvvon virusis, dadjá Brattland preassadieđáhusas.
Seamma preassadieđáhusas boahtá ovdan ahte njoammunguorran čájehii ahte olbmos lei dušše okta lagasoktavuohta ja dat lei su iežas ovttasássi. Ovttasássi lea maid leamaš erremis ja su koronaiskkosat leat leamaš negatiiva.
Goappašagat leaba geargan isolašuvnnain ja erremiin ja dieđihuvvon dearvasin.
