-Almmuhus-
-Almmuhus-
OĐĐASAT – Muhto, mun vuorddán dábálaš olmmošvieru buohkain! 


– Muhto, mun vuorddán dábálaš olmmošvieru buohkain! 


-

-

Guovdageainnu suohkanbáhppa sávvá buohkaide buresboahtima girkui sotnabeaivvi, ja vuordá buohkain olmmošvieru.

Dán vahkkoloahpa dollet sámi bonju olbmot Sápmi Pride doaluid Guovdageainnus. Dainna sii áigot čalmmustahttet ahte bonju sámit leat maid dábálaš olbmot nu go buohkat earát. Okta oassi sin prográmmas lea sotnabeaivvi girkostallan, dasa lassin go galget debáhtat, ráidovázzin, ja konsearttat.

 

Olmmošvierru

Guovdageainnu suohkanbáhppa, Bjarne Gustad, ii loga iežas jáhkkit makkárge erenoamáš dáhpáhusaid girkus geavvat dan ipmilbálvalusa oktavuođas. Son muitala sii eai leat ráhkkánan eará ládje go muđui ge dahket, ja son ii oainne dárbbu ráhkkanit ge eará ládje.

Sávan buohkaide buresboahtima girkui. Mii leat buohkat suttolaččat ja dárbbašit Jesusa evangeliumsániid gullat. Muhto, mun vuorddán olbmuin dábálaš olmmošvieru go girkus leat, in ge oainne dárbbu movt ge eará ládje ráhkkanit go muđui, in ge jáhke lea dárbu makkárge ávžžuhusaid ge buktit movt galgá láhttet girkus, lohká Gustad.

 

Eará fáddá

Gustad muitala sii leat girku bealis áigá juo mearridan mii galgá fáddán ipmilbálvalusas, ovdal go mearriduvvui ahte Sápmi Pride galgá Guovdageidnui, ja lea mearriduvvon ahte fáddá lea doaimmashehttejuvvon olbmuid birra.

– Mun in leat sártni ge ráhkkanan nu ahte galgá guoskat moktege Sápmi Pride oassálasttiide, in dieđe human go guđát báhkkoma birra ge. Láven muhtumin dan váldit ovdan, erenoamážit nuoraide, muhto in dieđe dagan go dál dan, lohká son.


RÁFÁLAČČAT: Sápmi Pride doaluid prošeaktajođiheaddji, Dávvet Bruun Solbakk, ii loga galgat makkárge riejaid sin bealis Sápmi Pride doaluid oktavuođas, erenoamážit ii goit girkus.
Govven: Nils Johan Vars

– Ráfálaš doalut

Sápmi Pride prošeaktajođiheaddji, Dávvet Bruun Solbakk, vuordá Sápmi Pride doaluid galgat ráfálažžan sin bealis, ja son sávvá earáid bealis maid šaddet ráfálažžan:

– Eat mii leat vuolgán hárdit dahje hástalit ovttage, mii leat ráfálaččat vuolgán Sápmi Pride doaluid lágidit Guovdageidnui. Mii illudit maid go eat leat goassege ná olu beroštumi ožžon go dál leat.

 

Ii sáhte ávžžuhit

Bruun Solbakk ii loga sin galgat makkárge miellačájehemiid galgat dahkat girkus sotnabeaivvi ge.

– Mii eat leat plánen doppe galgat makkárge miellačájeheami, oadjuda Bruun Solbakk Guovdageainnu searvegotti ja báhpa.

Son ii loga liikká sáhttit vástidit ovttage eará ovddas.

– Don han leat prošeaktajođiheaddji Sápmi Pride doaluin. Áiggut go ávžžuhit oasseváldiid ahte eai galgga ovdamearkka dihte leavggaiguin boahtit girkui sotnabeaivvi?

– Mun in sáhte earáid ovddas vástidit in ge sáhte dan akto mearridit. Dasa fertejit earát maid leat mielde, vástida son.


Guovdageainnu searvegotteráđi nubbijođiheaddji, Risten Turi Aleksandersen.
Priváhtagovva

Eará oaivilis

Guovdageainnu searvegotteráđi nubbijođiheaddji, Risten Turi Aleksandersen, muitala iežas eará oaivilis go Guovdageainnu searvegotteráđđi juste homofiillaid ja lesbbaid vihaheami gažaldagas. Go Norgga Girkočoahkkin lea mearridan ahte homofiillat ja lesbbat galget sáhttit náitalit girkus, de háliidivččii son ahte Guovdageainnu nuorat maiddái sáhtáše dahkat dan Guovdageainnu girkuin:

– Eatnasat geat náitalit min girkuin dáppe Guovdageainnus leat min iežamet nuorat geat leat bajásšaddan Guovdageainnus ja geain lea bearaš dáppe. Homofiila- ja lesbabáráide, geat leat dáppe eret, lea sihkkarit seamma dehálaš beassat náitalit juste dáppe, seamma ládje go eará báraide geat náitalit min girkuin. Dan dihte mun háliidan ahte mii eat hilggo min iežamet nuoraid go juo lea šaddan lohpi homofiillaide ja lesbbaide náitalit girkus.

 

Ávžžuha váikkuhit

– Ávžžuhan sin geat eai leat ovttaoaivilis Guovdageainnu searvegotteráđiin, girku maid atnit eará oktavuođain go dušše dál. Girkus mii dárbbahit álot eaktodáhtolaš vehkiid. Dakko bokte sáhttá de leat mielde váikkuheames searvegotti. Jus ii leat mielde váikkuheames, de han ii leat mielde mearrideames ge, lohká son.

Aleksandersen ii loga iežas ballat geavvamis girkus sotnabeaivvi maidege mii ii leat dohkálaš.

 

 

 

- Advertisement -
-Almmuhus-