Odne almmuhuvvo vuosttaš podcastoassi maŋŋel geasseluomu.
Ávvira podcast-ráidu «Mu Eallin» joatká fas. Odne almmuhuvvo vuosttaš podcastoassi maŋŋel luomu. Ávvira podcastbuvttadeaddji Anne Biret Anti illuda.
– Šaddá hui somá almmuhit ođđa osiid. Odne diibmu 18 almmuhuvvo vuosttaš oassi, mas oahpásnuvvat ođđa sámediggedirektevrrain Inger Marit Eira-Åhrènain. Son muitala earret eará ođđa barggu birra ja movt son čoavdá bearášdili go šaddá gaskkohagaid bargat Kárášjogas, máŋgačuohte miilla eret bearrašis Lulli-Sámis. Su ođđa árgabeaivvi ja jurdagat eallimis beassat gullat podcastas odne, dadjá Anti.
Nuvttá dađistaga
Juohke nuppi vahkku almmuhuvvo ođđa oassi. Juohke oasis lea ođđa guossi.
– Podcast lea vuosttažettiin Ávvira diŋgojeddjiide, muhto moadde vahkku maŋŋel go lea almmuhuvvon de beassá nuvttá daid guldalit Spotifys dahje iTunesas. Doppe lea juo dat oasit mat leat almmuhuvvon ovdal geasi, nu ahte gánniha fitnat guldaleame daid, muitala Anti.
Váldet oktavuođa
Vuosttaš oassi «Mu eallin»-podkasttas almmuhuvvui cuoŋománu.
– Mii leat hui giitevaččat sidjiide geat leat searvan min podcasttaide ja sávvat olbmot váldet oktavuođa minguin jus sis lea juoga maid dáhttot juogadit minguin ja Ávvira guldaleddjiiguin, dadjá Anti.
Odne diibmu 18:00 almmuhuvvo boahtte oassi Ávvira neahttasiidduin.
