Ođđa giellakampánjain «Sámás mánáin» áigu Sámediggi bagadallat ja leahkit doarjjan váhnemiidda giellaválljengažaldagain.
Ođđa giellakampánjain «Sámás mánáin» áigu Sámediggi bagadallat ja leahkit doarjjan váhnemiidda giellaválljengažaldagain.
Ođđa giellakampánja «Sámás mánáin» almmuhuvvo boahtte vahkku, duorastaga skábmamánu 10. beaivvi Álttás. Kampánja ulbmil lea čalmmustahttit fáttá giellaválljen mánnái, ja guovtte- ja máŋggagielatvuohta. Giela válljen mánnái ii leat álo nu álki, ja máŋgasiidda čuožžilit váttisvuođat dán oktavuođas.
– Sámediggi áigu váikkuhit dihtomielalašvuhtii vánhemiin giellaválljema ektui, juohkit dieđuid ja bagadallat ja leahkit doarjjan váhnemiidda, lohká sámediggepresideanta Aili Keskitalo preassadieđáhusas.
Sámegiella galgá fievrreduvvot buolvvas bulvii
Sámedikki váldomihttomearri sámegielaid ovddideamis lea ahte lassánivčče giellageavaheaddjit ja ahte sámegiella geavahuvvo eanet.
– Okta min váldobargguin lea bargat dan nala ahte sámegiella nannejuvvo ja ovddiduvvo boahtteáiggis, ja oassin dan barggus lea Sámediggi bidjan mihttun ahte sámegiella galgá fievrriduvvot buolvvaid gaskka ruovttuin, lohká Keskitalo.
Hehttet sámegiela hilgojuvvot
– Ruovttugiela válljen lea priváhta válga ja dan sáhttá dušše juohkehaš ieš dahkat. Jus galgat oažžut eanet giellageavaheddjiid de lea dárbu diehtojuohkimii ja máhttui giellaválljema birra ja árvvu birra máŋggagielatvuođas. Čájehuvvo ahte ollu váhnemat leat eahpesihkkarat dákkár dilis, ja go ii gávdno bagadallan dahje diehtojuohkin, de sáhttá geavvat nu ahte sámegiella hilgojuvvo, lohká Keskitalo.
Rekruteren váhnemiid
Kampánja oktavuođas lea Sámediggi rekruteren eanet váhnemiid geain leat iešguđetlágan vásáhusat giellaválljema ektui ja sii áigot juogadit iežaset historjjáid almmuheamis ja sii galget bargat kampánnjain ain ovddos guvlui.
– Mii leat ráhkadahttán njuoratmánná- páhkaid váhnemiidda geat easkka leat ožžon máná, ja dat juhkkojuvvojit dearvvašvuođastašuvnnain. Páhkas lea bagadallangihpa kampánja birra, unna lávllagirjjáš, body- bivttas ja šlembbon, main lea kampánja logo, muitala sámediggepresideanta Aili Keskitalo.
Rahpandoalut leat Scandic hoteallas Álttás. Álttá várresátnejođiheaddji Anita Håkegård galgá doallat sáhkavuoru. Doppe galget maid váhnemat geat leat rekruterejuvvon kampánjaváhnemiin muitalit iežaset vásáhusaid birra. Norgga árktalaš universitehtas boahtá Berit Anne Bals Baal logaldallat giellaválljema birra.
