Camp Villaks lea gaskal 14- ja 18-jahkásaš nuoraide, gos besset oaggut ja meahcástallat Norgga buoremus luossajogain.
Mihttu lea ahte nuorat galget buori oahpu oažžut, hárjáneami ja oaggunmáhtu.
Buorit guollebivdovásáhusat bidjet vuođu guhkes beroštumiide luossabivdui mii bistá eallenagi.
Lihkostuvvan doaibma
Camp Villaks lea doaibman máŋga jagi, ja lea čájehuvvon ahte prošeakta lihkostuvvá bures. Ollu oasseváldit leat vásihan vuosttaš luosa goddit doppe.
Váldodoaibma lea doaimmahit oagguma, ja nuorat ohppet dehálaš dieđuid, nu go gos luossa lea jogas, makkár čuolmmaid galgá máhttit, iešguđet oaggunnjuolggadusaid ja movt iešguđetlágan oaggunreaidduid geavaha.
Máŋgga campas leat maid oahppan vuokkaid dahkat, lohkat skálžžuid, sihkarvuođakursa buollinčáskadeddjiiguin ja fitnan guollešaddadanbáikkis.
Miehtá riikka
Dán geasi lea Camp Villaks 13 luossajogas. Dovddus luossajogat, nu go Álttájohka, Namsen, Málatjohka ja Vosso, leat mielde dán jagi Camp Villaks.
Galgá leat álki searvat, eai ge leat eará gáibádusat go ahte fertet háliidit leat mielde.
Hárjánan oahpaheaddjit muitalit maid máhttet luossabivddu birra, oaggundiŋggaid sáhttá luoikkahit ja lea hálbi searvat, čállá Norges Jeger og Fiskerforbund searvi preassadieđáhusas.
Ovttasbargoprošeakta
Lea báikkálaš johkasearvi ja báikkálaš bivdo- ja guollebivdisearvi mii lágida Camp Villaks, ja muđui leat Norske Lakseelver ja Norges Jeger- og Fiskerforbund veahkkin.
Lágideapmái manná ollu áigi plánemii, biergasiid háhkat, idjadanbáikki ráhkadit, čađaheapmái ja čorgemii maŋŋel.
Camp Villaks oažžu lágideapmái Birasdirektoráhtas ja Seastinbáŋkuvuođđudusas ruđalaš doarjaga.
