Ávvir lea dáhtton olbmuid evttohit árgabeaisáŋgariid, geat ánssášivčče juovlafuomášumi. Okta, gii háliida leat anonyman, lea evttohan ahte Anna Melkeråen galggašii oažžut fuomášumi.
– Sus lea hirbmat olu mokta, lea álo positiivvalaš, ja oaidná buohkain aivve dan buori. Son lea áŋgir, moddjái, utnolaš, veahkkái ja doaimmalaš. Son lea čeahppi movttiidahttit ja ovttastahttit earáid ja álggahit iešguđetlágan doaimmaid, ja danne lea ge hirbmat resurssan iešguđet lagasbirrasiin, čállá son.
Anonyma evttoheaddji maid čállá ahte Anna lea dakkár olmmoš gii oaidná buohkaid ja sus lea álo astu lonohallat sániid, iige sutnje leat mihkkege veadjemeahttun.
– Son duođaid ánssášivččii juovlafuomášumi, vai joatkkašii iežas buriin movttain maiddái earáid beaivválaččat illudahttit.
Joatká leahkit nu mo lea
– Ále, oi, man liekkus dahku!
Go gullá maid anonyma evttoheaddji lea čállán, de lohká ahte ledje erenomáš olu čáppa sánit su birra ja ahte dát sánit movttiidahttet su leat dakkárin go son lea.
Anna mielas lea hui somá go son lea nammaduvvon árgabeaisáŋgárin, ja lohká ahte ligge váimmu oažžut dakkár fuomášumi. Juste dál lea son ruovttus veallámin golgodávddain, ja lohká ahte dát dahku buoridii su beaivvi.
– Dát gal duođai movttiidahttá mu, dan gal in čiegat. Ja dat dahká ge nu mo dát olmmoš muitala, movttiidahttá mu ain joatkit leahkit nu, muitala Anna.
Anna maid muitala ahte lea buorre go Ávviris lea dakkár fálaldat, go juohkehaš dárbbaša veaháš fuomášumi muhtumin, ja dakkár fuomášupmi movttiidahttá olbmuid joatkit leahkit nu mo lea.
Son sáhttá maid muitalit ahte son loaktá bures Kárášjogas, ja liiko sihke báikái ja olbmuide Kárášjogas. Sutnje ii leat de váttis leat árgabeaisáŋgár go lea dakkár báikkis gos olmmoš loaktá áiggi.
Ávvuda juovllaid bearrašin
Vaikke loaktá áiggi Kárášjogas, de goitge áigu vuolgit lulás ávvudit juovllaid bearrašiin. Dán jagi son ávvuda Bergenis, iežas vielja luhtte, ja dohko bohtet maid su váhnemat.
– Ja doppe lea muohta dál, dat lea hui somá!
