Sámediggeráđđi lea juolludan 300 000 ruvnno doarjjan Skániid suohkana bondii Simon Pedersenii.
Sámediggeráđđi čállá preassadieđáhusas ahte Simon Pedersenis leat leamaš gusat mat njamahit gálbbiid návehis gávcci jagi ja son áigu nuppástuhttit doaimma dál vai sáhttá beavttálmahttit ja ovddidit doalu viidáseappot.
– Pedersen áigu ođastit dálá náveha, mas ii leat muhkkegeallir, návehin mas leat muhkkekanálat ja kanálaseaguheapmi, čállet sii.
Viidáseappot ain ovddidit
Sámediggeráđđi Silje Karine Muotka (Norgga Sámiid Riikkasearvi) lea movtta go Sámediggi doarjaga addima bokte sáhttá leat veahkkin viidáset ovddideamen doalu.
– Prošeakta áigu lasihit buvttadeami fitnodagas ja lasihit árvoháhkama eanadoalus Skániid suohkanis, dadjá sámediggeráđđi Silje Karine Muotka.
Bargosajiid lasiheame
Doarjja lea juolluduvvon doarjjaortnegis Vuođđoealáhusat. Dán doarjjaortnega ulbmilin lea lasihit bargosajiid vuođđoealáhusain ovdal jagi 2025.
– Doarjagiin mat mannet eanadollui vuoruhuvvojit dán jagi ođasmahttimat ja dáláš doaibmavisttiid viiddideapmi, heivehandoaibmabijut ja prošeavttat mat váikkuhit rekrutteremii, buoret árvoháhkamii ja eanadoalu ovddideapmái. Mun doaivvun ahte doarjja nannešii bearraša bargosajiid ja ahte šattašii álkibun čuovvovaš sohkabulvii váldit badjelii doalu, dadjá Muotka.
