Árbevieru mielde šaddá fas ollu čottalávlun Olmmáivákkis go Riddu Riđđu lágida festivála.
Árbevieru mielde šaddá fas ollu čottalávlun Olmmáivákkis go Riddu Riđđu lágida festivála.
Kiinná-mongolalaš joavku Hanggai lea ožžon buriid árvosániid ja njuorasmahttán festiválamanniid miehtá máilmmi. Vuosttaš skearru almmuhuvvui 2008:s, ja vaikko sin musihkka, čuojanasat ja lávlunvuohki leat árbevirolaččat, de gávdno maid ođđaáigásaš jietnagovva sin musihkas.
Stuora dáhpáhus
– Dá šaddá okta dain stuorámus dáhpáhusain festiválas! Hanggaia musihkka lea vuogas seaguhus árbevirolaš mongolalaš musihkas ja rockas. Sis lea lávdeláhtten mii heive buohkaide, muitala Riddu Riđu festiválahoavda Karoline Trollvik.
Hanggai vuittii diimmá taleantagilvvu Kiinnás ja leat ožžon ollu rámádusa dan maŋŋel, ja dán giđa ilbmá sis ođđa skearru.
Váriid gaskkas jupma
Festiválahoavda lohpida ahte Riddu-giettis boahtá jupmat garrasit go Hanggai čuojaha heastaoaivefelain, el-gitárain ja garra vokálain lávddis.
– Vásáhus maid dáiddát guhká muitit, loahpaha Trollvik.
Ovdalaččas lea Riddu Riđđu almmuhan dán jagi artisttaid nu go Sondre Justad, Sofia Jannok, Ylva ja Márjá Mortensson. Festivála lágiduvvo gaskamutto suoidnemánu Gáivuonas, Romssa fylkkas.
