Mona Solbakk lea leamaš NRK Sámi bajimuš hoavda 2015 rájes. Dál lea mearridan heaitit direktevran ja bargagoahtit prošeavttaiguin sámi divišuvnnas.
– Mii eat leat goassige beroštahttán nu ollugiid sámi sisdoaluin ja fáttáiguin go dál. Nu dahkat ođasáššiiguin, mánáidsisdoaluin, kultur- ja guoimmuhemiin. Lea duođai rámidan veara mo NRK Sámi ja NRK bargit leat ovdánahttán ja lokten sámi sisdoalu. Máŋggaid jagiid garra bargu buktá bohtosiid. Dovddan nu giitevašvuođa go lean beassan jođihit dán ásahusa badjel vihtta jagi, lohká Mona Solbakk preassadieđáhusas.
– Nannen sámi fálaldaga
Sáddehathoavda Thor Gjermund Eriksen giitá heaiti direktevrra dan stargadis ja nanu barggu NRK ja sámi doaimma ovddas.
– Mona lea árjjalaččat ođasmahttán ja ovdánahttán NRK Sámi. Su jođihemiin lea sámi álbmoga mediafálaldat nanusmuvvan. Seammás lea sámi kultuvra, giella ja duohtavuohta dál eanet oidnosis buohkaide Norggas, lohká Eriksen.
Globála gilvu
Solbakk jođihanáigodagas lea mediamárkka garrasit rievdan. Sámi sisdoallu gilvala stuorra, riikkaidgaskasaš rávdnjenbálvalusaid vuostá.
– Gilvu lea garas. Jos publika ii vállje sámi sisdoalu, de das ii leat árvu dahje ávki. Sisdoallu ferte leat alladásat, almmuhuvvot rivttes áigái, rivttes báikái ja lávdái. Dákkár rievdadeaddji mediamárkanis lea mu mielas dehálaš ahte organisašuvdnii bohtet ain ođđa jođihansearat. Ja dál dovddan ahte lea áigi láhčit saji ođđa direktevrii, lohká Solbakk.
– Mun sávan ahte mu bargu lea veahkehan nannet organisašuvnna viidásat ovdánahttimiidda ja ovttasbargui NRK:s sámi doibmii, lohká heaiti direktevra NRK preassadieđáhusas.
Son joatká NRK Sámis vaikke heaitá direktevran, ja bargagoahtá de doaimmahuslaš prošeavttaiguin Tromssas.
Direktevrravirgi almmuhuvvo oalle fargga. Solbakk joatká virggis vel ovtta áigge.
