Meterologalaš instituhta stáhtameterologa Romssas, Justyna Wodziczko ii sáhte lohpidit silbafierttu Guovdageidnui ja Kárášjohkii daid beassážiid.
Meterologalaš instituhta stáhtameterologa Romssas, Justyna Wodziczko ii sáhte lohpidit silbafierttu Guovdageidnui ja Kárášjohkii daid beassážiid.
Wodziczko muitala goappeš báikkiin lea sullasaš dálki, veaháš beaivvadat,veaháš borga ja veaháš biegga.
– Skilleduorastaga lea stuorimus vejolašvuođa beaivváža navddašit goappeš báikkiin, go de lea eanas áigge fiertu ja lea oalle goalki. Temperatuvrrat rievddadit gaskkal -10 ja -20 gráda.
Bivalda loahpas beassážiid
Wodziczko muitala guhkesbearjadaga lea luládat loaččes biegga, ja boahtá maid veaháš borga, ja temperatuvrrat eai rievddat.
– Beassášlávvordaga boahtá nubbi borgaoakti ja muohttá oarjjageahčen Finnmárkkuduoddaris. Lea oalle goalki ja eahkedii sáhttá boahtit loaččes hieibma. Vuosttaš beassášbeaivvi loktanit temperatuvrrat –2 grádii, ja šaddá beaivvádat. Nuppi beassášbeaivvi bivalda vel eambbo ja temperatuvra loktan 0 grádii, muitala Wodziczko.
Olle sihkkaris dieđáhus
Stáhtameterologa muitala sii geavahit prognosaid mat bohtet «National Wether Service» Reading báikis Englánddas mihtidit dálki.
–Dat prognosat leat oalle sihkkarat guhkitáiggi dálkedieđáhusaide. Nu movt skilleduorastagas beassášlávvordahkii de leat oalle sihkkarat ahte šaddá nu movt leat dieđihan. Sotnabeaivvi ja mánnodaga, eat leat áibbas sihkkarat, muhto lea jáhkehahtti dálki šaddá nu movt leat dieđihan, lohká Meterologalaš instituhta stáhtameterologa Justyna Wodziczko.
