-Almmuhus-
OĐĐASATMollii viđain beatnagiin 

Mollii viđain beatnagiin 

-

-

Kárášjoga nieida Silje Máret Somby čađahii iežas nuppi Finnmarksløpet gilvvu, ja son lea duhtavaš vuodjimiin vaikko boađus ii šaddan nu buorre. 

Vaikko vel leat ge leamaš bárttit ja beatnagiid lea šaddan guođđit, de lea Silje Máret Sombys buorre mokta ja dovdu go veaháš lea beassan vuoiŋŋastit maŋŋel go ollii mollii Finnmarksløpet 500 kilomehtera gilvvus. 

– Mun lean viehka movtta go oba joavddaimet ge mollii. Mii leat bártidan go reahka billašuvai ja golbma beatnaga šadden guođđit bisánanbáikkiide, dadjá Silje Máret Somby. 

Somby lei 29. vuoddji gii ollii mollii Áltái maŋŋel go lei vuodján badjelaš 48 diimmu. 

 

Diđii ahte šaddá guođđit beatnaga

Son muitala diehtán ahte šaddá guođđit ovtta beatnaga go dat ii leat leamaš áibbas gearggus ovdal vuodjimiid.

Vaikko dat ii nagot čuovvut olles dan 570 kilomehtera, de lea beana nu dehálaš jođiheaddji ahte Somby ii sáhttán álggahit Finnmarksløpet dan haga.

Beanavuoddji ii lean gal rehkenastán dárbbahit Mázii ja Guovdageidnui maid guođđit beatnagiid. 

– Go njiedjá Mázii, de lea hirbmat allat ja buohkat, geat vudjet ovddabealde, gohcet. Ja go gohcet, de šaddet rokkit ja dakkár roggái gahčai mus okta beana. Dan šadden guođđit Mázii. Nubbi ges heittii gaikumis, dan šadden guođđit Guovdageidnui. Dat lea seamma beana go mainna bártidin Boaresárku vuodjimis, muhto dalle gal doaibmagođii go lei reagas vuoiŋŋastan moadde miilla. Sávven ahte doaibmagoahtá dál maid, muhto dan ii dahkan, čilge beanavuoddji. 

 


Gearggus: Silje Máret Somby lea gearggus maŋŋel go lea ráhkkanan guhkes mátkái. 
Govven: Marit Elin Kemi

 

Balai ahte ii olle mollii

Silje Máret muitala iežas leamaš hui eahpesihkar joavdá go oba molliige maŋŋel go goalmmát beatnaga lei guođđán Váljohkii.

Son ja beatnagat leat vuoiŋŋastan oktiibuot 30 diimmu vaikko gáibiduvvon vuoiŋŋastanáigi ii lean go 22 diimmu.

Muhto Silje Máret ieš ii leat oađđán oktiibuot go birrasii njeallje diimmu lávvordagas disdahkii. 

– Mii vuoiŋŋasteimmet guhká Kárášjogas. Doppe lei gáibiduvvon guhtta diimmu vuoiŋŋastit, muhto mii oruimet badjel čieža diimmu. Okta beatnagiin lei doŋgon ja mun fertejin bargat ollu, dan  ruvvet ja ligget bures ovdal go mii beasaimet johtui. Lea oainnát nu ahte jus leat vuollel vihtta beatnaga, de ii beasa joatkit vuodjima. Mun vudjen hui várrogasat Váljogas gitta Áltái, muitala Silje Máret. 

 


Eadni ja nieida: Silje Máret etniinis, Birehiin, ovdal vuodjima. 
Govven: Marit Elin Kemi 

 

Luoikkas beatnagat

Dušše guokte dain beatnagiin mat Silje Márehis ledje mielde diibmá go vujii gávccát sadjái, ledje mielde dán jagi.

Dán čilge son nu ahte muhtin beatnagat leat boarásmuvvan ja earáin fas leat leamaš smávva sivat ovdal gilvvu.

Silje Máret lea leamaš nu eahpesihkar guđe beatnagiid váldá mielde ahte dan ii mearridan ovdal logi diimmu ovdal go vulggii Álttás. 

– Dál maŋŋel gal dieđusge lea álki jurddašit ahte in lean galgat váldit mielde dan mii Guovdageidnui bázii, dadjá son. 

– Mun šadden luoikkahit vel golbma beatnaga, go mus eai leat alddán dál doarvái beatnagat mat leat rievttes agis ja rievttes láhkai hárjehallan. Buot suohttaseamos lea ahte okta beatnagiin man luoikkahin lei beana man muhtun eará ii fuollan mielde Finnmarksløpet gilvui. Mu ráiddus ruohtai dat beana njunnošis ja válddii ovddasvástádusa. Dat lei maid akto njunnošis Váljogas Áltái. 

 

Dárbbaša eambbo beatnagiid

Silje Máret ii loga vel iežas mearridan searvá go eambbo gilvvuide dán jagi, muhto muitala ahte sus lea jurdagiin joatkit beanavuodjimiin boahtteáiggis.

Beanavuodjin lea divrras falástallansuorgi ja vai galgá nagodit ruđalaččat, de ferte gávdnat eambbo sponsoriid.

Boahtte jahkái son ferte oastit eambbo beatnagiid go sus eai leat doarvái beatnagat dál ja dat han maid boarásnuvvet. 

– Jus galggan joatkit beanavuodjimiin, de lean gávnnahan ahte mus fertejit leat 14 beatnaga mat leat rievttes agis ja maid hárjehan dan guvlui ahte galget searvat Finnmarksløpet gilvui. Mun in sáhte nu go dán jagi, ahte bákkus ferten váldit mielde dakkár beatnagiid mat eai leat áibbas gergosat, dadjá Silje Máret. 

Dán jagi sus leat leamaš golbma sponsora mat leat veahkehan su, ja dat leat Averdi Kárášjogas, K-Market Härkönen Gáregasnjárggas ja Privat vet praksis Hámmárfeasttas. 

– Dat gal lea veahkehan mu hui ollu, dadjá Silje Máret. 

 

Jovssahalai olbmái

– Ovdalaš Iešjávrri jovssai okta olmmái (Mailin Jerijervi) min ja mii čuovvuleimmet su. Mis šattai hui liekkus maŋemus vuorru Joatkkas Áltái go vuojašeimmet fárrolaga. Mus lei olmmái geainna bessen hállat ja beatnagat maid dolle eambbo leavttu go Mailin lei min ovddabealde, muitala Silje Máret. 

De go ledje vuodján Joatka meaddel, de gal lei Silje Máret ge mearridan ahte son vaikko geassá beatnagiid mollii Áltái jus dat bisánit. 

 

Duhtavaš

Vaikko vel ii šaddan ge nu buorre boađus go diibmá, de lea Silje Máret hui duhtavaš gilvvuin.

Son muitala iežas oahppan ollu eambbo dán jagi go diibmá ja ahte sus ledje hástalusat álggus lohppii. 

– Mun lean leamaš veaháš dego «MacGyver» (TV-sáŋgár) go biergasat billašuvve. Lean oahppan ollu ja bargan ollu iežan movttain ja lean hui duhtavaš go lean nagodan leahkit positiiva čađat. Lea leamaš lossat ja ollu hástalusat. Mu mielas lea hirbmat somá go nagodeimmet čađahit vaikko leat leamaš ollu hástalusat. Hui duhtavaš vuodjimiin vaikko in vuoitán. Mun lean duođaid bargan ollet Áltái. Nie čoahkkáigeassá Silje Máret iežas dán jagáš Finnmarksløpet gilvvu vásáhusaid.

– Dál áiggun vuoiŋŋastit bures, go dovdo rupmašis ahte lean bargan garrasit máŋga jándora. Oađđit ja boradit bures ovdal go válddán beatnagiid mielde ja vuolggán Báhčaveadjái lustatuvrii. Lea buorre beatnagiidda maid veaháš geahppasit tuvrii vuolgit dál, loahpaha Silje Máret Somby. 

-Almmuhus-