Anne Margrethe Krohg gudnejahttojuvvo go lea fállan Finnmárkku mánáide ja nuoraide doaimmaid badjel 40 jagi.
Anne-Margrethe Krohg, dahje «Molle», nu go gohčoduvvo, oaččui gonagasa ánsomedálja mannan bearjadaga.
«Molle» gudnejahttojuvvo go lea Leavvajoga duottarstobus ja riidenguovddážis fállan doaimmaid mánáide ja nuoraide badjel 40 jagi.
Son lea erenomáš bures vuostái váldán mánáid ja nuoraid geain leat erenomáš dárbbut dahje leat doaimmashehttejuvvon.
Olles fylka
Krohg ii leat láhčán doaimmaid dušše Deanu gieldda mánáide ja nuoraide, son lea fátmmastan olles Finnmárkku.
Finnmárkku fylkkamánni, guhte geigii ánsomedálja Kroghii, dajai sártnistis ahte «Molle» doaimmas leat mánát ja nuorat vásihan ovddasmorraša, luohttevašvuođa, áŋgiruššama ja heivehemiid.
Son čoavdá hástalusaid čehpet, lea siivui ja searalaš.
Anne Margrethe Krogh lea oahppan mánáidsuodjaluspedagoga, ja oahpustis lea geavahan iežas barggus.
