Stáhta geaidnodoaimmahat dieđiha dál šaddá fas vejolašvuohta geahččalit olahit mohtorsihkkelvuodjinkoartta cehkiid A, A1 ja A2 dán vahku rájes. Fálaldat leat čatnot iešguđet johtolatstašuvnnaid návccaide ja makkár dálki ja siivu lea dan beaivvi.
– Vaikko johtolatstašuvnnat leamaš gitta guhkes áiggi, de eat leat maŋŋonan mohtorsihkkelvuodjinkoartta vuodjingeahččalemiiguin, lohká Stáhta geaidnodoaimmahaga ossodatdirektevra Henning Harsem preassadieđáhusas.
Son muitala sii rahpet fas dán fálaldaga go lea álkibut eastadit njoammudeami mohtorsihkkeliin go vuojána siste. Johtolatskuvllain leat juo moadde vahkku oahpahan ohppiide vuodjit mohtorsihkkela ja oahppit leat gárvásat geahččalit olahit alcceseaset vuodjinkoartta.
– Stáhta geaidnodoaimmahat ja johtolatskuvllasuorgi leat bargan ovttasráđiid dearvvašvuođaeiseválddiiguin gárvet makkár njoammueastadanstandárda galgá leat johtolagas. Lea hui gáibideaddji oahpahit ja čađahit vuodjingeahččaleami ovtta vuojánis guhkit áiggi ja seammás fuolahit doarvái buori njoammueastadeami. Dat lea sivva manin eat leat álggahan vuojánfievrredanoahppu ja vuodjingeahččalemiid vuos. Mii gulahallat dearvvašvuođaeiseválddiiguin ja álggahat biillaid ja lossabiillaid vuodjinoahpaheami nu jođánit go sáhttit, čilge Harsem ja lohká jus ležžet jearaldagat, de váldet suinna oktavuođa.
