-Almmuhus-
OĐĐASATMobiila-applikašuvnnain dustet boazolihkohisvuođa biilajohtolagas

Mobiila-applikašuvnnain dustet boazolihkohisvuođa biilajohtolagas

-

-

Maŋŋel guovtti jagi geahččalanprošeavtta, man bijai johtui Lappi Ealáhus-, johtolat- ja birasguovddáš Suoma bealde ulbmiliin  dustet boazobárttiid mátketelefovnna teknologiijain,  de háliidit dál viiddidit prošeavtta doaimma olles boazodoalloguvlui go leat buorit bohtosat.

Dán čállá odne Yle Sápmi ahte Suoma bealde dáhpáhuvvet 4 000 boazolihkohisvuođa jahkásaččat danin ge 2013:s lea biddjon johtui prošeakta mas atnet mátketelefovdna-applikašuvnna reaidun. Geahččalanprošektii serve 25 biilavuoddji.

Mobiilaváruheami geahččaledje Suomas 2013–2015 áigodagas guovtti geainnus ovttas 25 ámmátvuddjiin. Mobiila-applikašuvdna doaibmá GPS-báikediehtoprográmmain nu ahte go vuoddji oaidná bohccuid geainnu alde dahje geaidnoguoras, de son dušše deaddila telefovnna, mii sádde váruhusa automáhtalaččat eará, lahkosis vuoddji applikašuvnna geavaheaddjiide.

 

Buorit bohtosat

Geahččalanprošeakta guovtti jagis oaččui buriid bohtosiid, ahte dan leat dál mearridan viiddidit olles boazodoalloguvlui Suoma bealde. 25 ámmátvuoddjis 92 proseantta lohke mobiila-applikašuvnna ávkkálažžan. Dál háliidit viiddidit prošeavtta doaimma olles boazodoalloguvlui mihttomeriin geahpedit boazolihkohisvuođaid beliin 2020 rádjái.

Jierbmeteknologiija addá dasa goit ođđa vejolašvuođa, go iešguđetlágan jierbmeapparáhtaid lássaneapmi addá vejolašvuođa áigeguovdilis boazováruheapmái báikedieđuid ávkkástaladettiin, muitalit Lappi Ealáhus-, johtolat- ja birasguovddážis Yle Sápmái.

Prošeakta lea boktán beroštumi viidát, maiddái riikaviidosaččat ja dat leage mielde ITS Europe -semináras Skottlánddas geassemánu 6.-9. beivviid.

-Almmuhus-