Moaitán guhkkodaga ja divrrašan gilvvuid

Maŋit vahkkoloahpa lágida Guovdageainnu mohtorsearvi sin jahkásaš čáhcecrossa gilvvuid Guovdageainnu eanu alde.

Dán vahkkus ráhpe sii dieđiheami gilvvuide, muhto dat ii leat dáhpáhuvvon jávohemiid. Máŋggas leat earret eará divrrašan gilvvuid ja ahte bistá beare guhka.

Ollus váldán oktavuođa

Guovdageainnu mohtorsearvvi nubbinjođiheaddji Anni Rauna Triumf muitala sii leat moaitámušaid ožžon sihke facebooka, E-boasttaid ja telefuvnnaid bokte.

– Olbmot leat moaitán ahte lea beara divrras, ja jus vuohččan áigu vuoddjit de máksá oktiibuot 1300 ruvnno. Álggos juohke gilvui máksit 700, ja de skohtera desinfiseret 400 ja vel liseansa 200. Sidjiide geat leat ovdal dán jagi gilvvohallan, leat juo máksán liseansa, lohká son.

Leat lokten hattiid

Triumf muitala sii leat stivrras mearridan hattiid ja lokten daid diimmá ektui, ja leat maid unnidan vuoittut.

– Diibmá manai buot ruhta mii bođii sisa vuoittuide ja veaháš vel, nu ahte danne leat lokten hattiid vai galgá báhcit midjiide juoga, lohká son.

Fertet dahkat juoidá

Triumf muitala dán rádjai leat 11 vuoddji dieđihan, ja máŋggas áigot dušše ovtta dahje guovtti gilvui searvat.

– Diibmá ledje 70 olbmo dieđihuvvon gilvvuide, muhto jus čájehuvvo ahte vuoddjit eai oro dieđiheame gilvvuide hattiid geažil, de fertet juoidá dáhkat dainna,lohká son.

Vuoruhit álgoálgiid

Moaitámušaid dasa go gilvu bistá nu máŋga beaivvi lohká Triumf sii eai olle buot čađahit guovtti beaivvis, ja jus dan galget de šaddet unnidit gilvvuid. Son lohká go sii ledje geat álggos álge čáhcecrossain Norggas, ja ollesáigge leat vuoruhan álgoálgiid, de eai sáhte unnidit gilvvuid.

– Min mielas lea rekruteren dehálaš, ja danne lea «rookie» luohkká buorre go dasa eai beasa hárjánan vuoddjit searvat. Oassálastit besset gilvalit eará álgoálgiiguin, lohká Triumf.

Dollet čoahkkima

Triumf muitala Mohtorsearvvis stivrras ii leat leamaš áibbas ovttaoaivilvuohta daidda rievdademiide, ja mii galgat ge fargga doallat fas stivračoahkkima, gos váldet dáid áššiid bajás.

– Mii ferte árvvoštallat leago beare divrras, go ovdamearka dihte jus Suomas galgat oažžut gilvaleddjiid de sáhttá sidjiide gártat divrrasin. Jus sis ii leat registrerejuvvon skohter, de ferte duollus máksit depositumma skohtera ovddas go rasttilda ráji ja vel galgá gilvalit.

Ii buot hálbbimus

Beakkán čáhcecrossavuoddji Morten Blien, gii dán geasi lea oassálasten 11 iešguđet gilvvuide, lohká ii leat buot hálbbimus gilvvohallat Guovdageainnus, muhto ii buot divraseamos ge.

– Vaikko lea veahá divrasit, mun gal goitge lean searvame watercrossii, go dat lea maid kvalifiseren Eurohpá meašttirgilvvuide, lohká son. Blien áiguge dušše watercrossii searvat lávvordaga ja de vuolgá ruoktot.

Lei oažžot oaneheabbo áiggis

Blien mieđiha ahte ledje oažžut lágidit eanet gilvvuid ovtta dahje guovtti beaivvis.

– Mus ii asttu iige hállu go mun áiggošin maid veaháš friddja geasset, ja vuoruhit eará diŋggaid lohká son.

Ipmárdus

Blienis gal lea ipmárdus ahte Guovdageainnu mohtorsearvi lea lokten hattiid, go sii han maid fertejit dinet.

– Dat máksá doallat searvvi ja lágidit gilvvuid, eaige mu mielas leat nu heitot ruhtavuoittut eará gilvvuid ektui. Gaskamearalaččat leat sullii 10.000 ruvdno vuoitun gilvvuin, goit watercrossas, lohká Blien.

Gilvvut leat bearjadaga, lávvordaga ja sotnabeaivvi borgemánu 19. beaivvis gitta 21.beaivái. Bearjadaga lágiduvvo hárjehallan, lávvordaga lea watercross, ja sotnabeaivvi Dragrace ja ovalavuoddjin.