Davvi-Hålogalándda bisma Olav Øygard hállá Finnsnesa kirkodorvoášši birra ja dan hárrái moaitá ráđđehusa garrasit.
Davvi-Hålogalándda bisma Olav Øygard doallá iežas jahkesártni Davvi-Hålogalándda neahttasiiddus tiibmu 12.00 ođđajagemánu logát beaivvi. Koronapandemiija geažil lágiduvvo dat digitála vugiin. Su sártni gávdná maid doppe.
Teologalaš neavvu Steinar Sneås Skauge muitala ahte bisma čalmmustahttá áigeguovdilis fáttáid mat dál leat sihke kirkus ja servodagas.
– Dás hállá maid kirkodorvoášši birra Finnsnes báikkis Tromssas ja moaitá ráđđehusa garrasit dan hárrái. Son váldá maid ovdan vuoiggalašvuođa ja soabadanbarggu mii dál lea jođus dan dáruiduhttima maid sápmelaččat, kvenat, ja norgalašsuopmelaččat gillájedje ja maid kirku áigu dahkat dan ektui, muitala teologalaš neavvu Steinar Sneås Skauge preassadieđáhusas.
Ruđaid divvut kirkuid
Sneås Skauge lohká ahte bisma áigu maid ávžžuhit merket sierra ruđaid áimmahuššat dehálaš kulturhistorjjálaš maŋŋá soađi huksejuvvon kirkuid go dat lea juo oalle boarrásat dál.
– Dasa lassin áigu maid bisma hállat eambbo daid siskirkolaš fáttáid birra, nu go kirku vástádus koronarossui ja kirku kulturguoddin maid sáhttá čalmmustahttit sámi ja kvena sálbmariggodaga áimmahuššamii, joatká Sneås Skauge.
