Sámi rádjahehttehuslávdegoddi lea ožžon moadde cealkámuša mo olbmot vásihit stáhtárájit heađuštit ovttasbarggu rastá rájáid.
Sámi rádjahehttehuslávdegotti lea Sámi Parlamentáralaš Ráđđi (SPR) nammadan, mii lea golmma Sámedikki ovttasbargoorgána. Lávdegotti bargun lea identifiseret nu gohčoduvvon rádjahehttehusaid mat váddudit ovttasbarggu ja oktavuođa sámiid gaskka iešguđege stáhtarájáid bealde, ja buktet hástalusaid olbmuide, bearrašiidda, organisašuvnnaide, ásahusaide dahje ealáhusaktevrraide.
Dássážii leat boahtán moadde cealkámuša iešguđet olbmuin, gos čilgejit movt stáhtaráját heađuštit ovttasbarggu. Earret eará čállá okta olmmoš:
– Háliidan váldit ovdan ovtta ášši mii hehtte ovttasbarggu Deanuleagis. Mis ii leat lohpi golgadit ovttas kránnjáiguin. Vaikko sihke mus ja kránnjás lea lohpi golgadit, de ean sáhte ovttas golgadit dannego nubbi ássá Norgga bealde ja mun Suoma bealde. In oppa dieđe manne ii leat lohpi, muhto johkafávttat leat bissehan olbmuid ja gáibidan ahte heitet golgadeamis ovttas dannego nubbi galgá bissut iežas riikkas.
