-Almmuhus-
-Almmuhus-
OĐĐASATMoaitá garrasit go stáda áigu oasehas­veahkkin Øy­fjellet Windai

Moaitá garrasit go stáda áigu oasehas­veahkkin Øy­fjellet Windai

-

-

– Oaivvildan departemeantta viiddida vel eanet riidodási dáinna áššiin, dadjá sámediggeráđđi Maja Kristine Jåma (NSR).

Stáda, Oljo- ja energiijadepartemeantta bokte, lea dieđihan nu gohčoduvvon oasehasveahkkin Øyfjellet Windai Øyfjellet bieggafápmodoaimmahaga árvvoštallanáššis. Dan moaitá sámediggeráđđi Maja Kristine Jåma garrasit. 

Øyfjellet Wind ja Jillen-Njaarke orohat deaivvadit Helgelándda diggegottis miessemánus bággolotnunáššis Øyfjellet bieggafápmodoaimmahaga birra.

– Departemeanttas leat guokte rolla vuhtiiváldit. Galgá sihke doahttalit boazodili olmmošvuoigatvuođa suodjaleami ja sáhttit bealuštit iežaset mearrádusaid dohkálašvuođa. Oljo- ja energiijadepartemeanta ii nákcen dássedit doallat dán guokte beroštumi go serve oasehasveahkkin Fovsen-áššis, ja lea ge ágga leat kritihkalaš dasa ahte nákcejit go Øyfjellet-áššis ge, dadjá Jåma.

Ovdal ohcalan 

Oljo- ja energiijadepartemeanta attii 2016 skábmamánu Eolus Vindii (dál Øyfjellet Wind) konsešuvnna hukset ja jođihit Øyfjellet vindkraftverk Vaapste suohkanis Nordlánddas. Konsešuvdnaášši oktavuođas mieđihuvvui maid bággolonisteapmi. Øyfjellet bieggafápmodoaimmahaga plánaguovlu lea Jillen-Njaarke orohagas.

Sámediggi lea ovdal jo ohcalan movt departemeanta áigu sihkkarastit ahte konsešuvdnaeaktu beassanluotta birra dálveguohtumii suodjaluvvo, ja movt áigot dustet boazodoalu hástalusaid mat leat čuožžilan go konsešuvdnaeavttut eai leat čuovvuluvvon.

– Mun reageren garrasit dasa maid stáda áigu bargat. Ii mis sáhte nu ahte boazodoalloorohagat, main leat jo ovdalaččas unnán resurssat, galget álo dikkis diggot stáda vuostá áššiid birra main fuolahit iežaset olmmošvuoigatvuođaid, loahpaha Jåma.

-Almmuhus-