-Almmuhus-
-Almmuhus-
-Almmuhus-
OĐĐASAT– Mis lea sámegiella báikkálaš politihka dihte

– Mis lea sámegiella báikkálaš politihka dihte

-

-

Deanu sátnejođiheaddji Frank Ingilæ ii leat ovttaoaivilis oahpahusdilli hedjona jus lea báikkálaš politihka duohken, ja lohká lea juste báikkálaš politihkka mii lea dagahan ahte Deanu gielddas lea  sámegiella nanus.

Sirpmá ja Ohcejoga sámemánáid váhnemat ja sámesearvvit bivdet fuomášumi Árktalaš oahpahuskonfereanssas, mii dál lea Guovdageainnus, go sámi mánáid giella- ja oahppovuoigatvuođain lea rašes vuođđu nu guhká go lea gielddaid bušeahtaid, skuvlaeiseválddiid ja báikkálaš politihka duohken.

 

Sámegiella guovddážis

– Lea juste báikkálaš politihkka dihte ahte Deatnu lea mielde sámegielagiellahálddašanguovllus, ahte mis lea sámeskuvla dáppe, ahte mis lea sámegiella skuvllas. Mis leat maid leamaš guokte sámeskuvlla, vaikko ii livčče dárbu dasa ja mii divrroda buot, muhto dat lea danne go báikkálaš politihkka háliida nu. Mii nákcet báikkálaš politihkain ollu guhkkelii go maid ovdamearka dihte sámediggi goassige sáhttá dáhkkát, oaivvilda Ingilæ.

 

Skuvla iige skuvlafálaldat

Ingilæ lohká son ipmirda ahte lea váivi massit lagasskuvlla, muhto dat mearkkaša dušše ahte skuvla heaittihuvvo iige fal skuvlafálaldat go dat sirdojuvvo Deanu šaldái.

– Das lea dieđusge ruđa birra sáhka, muhto skuvla lea ohppiid váras ja go leat unnán oahppit, ja eai leat doarvái oahpaheaddjit de fertet eará čovdosiid gávdnat, ja nu leat dahkan dán áššis.

 

Ovttasbargu joatká

Ingilæ  lohká maid rádjeskuvla ovttasbargu Ohcejoga gielddain ii heaittihuvvo, go dat lea dehálaš mánáid giellaohppui.

– Dat galgá jotkojuvvot čakčii, muhto ii dieđusge šatta seamma ládje go ovdal lei, gaskkaid dihte. 

 

(Ášši jotkojuvvo gova vuolábealde)


Sámedikki ráđđeláhttu, Silje Karine Muotka ii sáhte lohpidit váldet go bajás ášši AIEC2016 konferánssas. Govven: Ovlla Gaup

 

Váttis fuomášuhttet konferánssas

Sámedikki ráđđeláhttu, Silje Karine Muotka, geas lea ovddasvástádus máhttu ja ealáhusgažaldagaide ii sáhte vuos dadjat áigot go fuomášuhttet dán ášši Árktalaš eamiálbmot oahpahuskonfereanssas, go dat ii leat oktasaš oassi das.

–Mun ferten háleštit mu hoavddain ja iskkat movt mii sáhttit čoavdit dán. Dán konferánssas lea dievva prográmma mii lea áigá plánejuvvon, muhto lea buorre go váldo bajás ášši, lohká Muotka.

 Muotka lohká ipmirdit váhnemiid Ohcejohnjálmmis ja Sirpmás.

– Sámedikki bealis oaidnit ovdamuniid ovttasbargguin, ja sávvamis ožžošeimmet oktasaš oahppoplánaid goappešat riikkain, juobe sámegiela fágas.

 

-Almmuhus-