– Mis galget boanddat eai ge boraspiret guovllus

Deanu gielddas lea vuođđoealáhus dehálaš, muhto nu go máŋgga eará gielddas, de rahčet boraspirevahágiin. Maŋemuš áigge lea guovža speadjan guovllus ja goddán máŋgalogi sávzza, ja Guovddášbellodaga sátnejođiheaddjeevttohasa Einar Johansena mielas lea dál doarvái ja lohpida iežas jienasteddjiide bargat dan nammii ahte guovddáš eiseválddit rievdadit boraspirepolitihka.

– Mii leat dorjon boanddaid olles dán áššis, ja áigut bargat áŋgirit sin ovddas ja eará vuođđoealáhusaid ovddas, lohká Einar Johansen.

Boanddat eai galgga gillát

Guovddášbellodaga sátnejođiheaddjeevttohas ii loga riektan ahte boanddat ja earát galget gillát go boraspiret speadjá.

– Lea nu ahte mii báikkálaš politihkkárat eat sáhte mearridit stáhta badjel, muhto mun oaivvildan ahte dál fertejit guovddáš politihkkárat morihit ja váldit ovddasvástádusa go jo áigot doalahit boraspirenáli. Mu dihtii gal jullot jávkadit buot, mis galget leat boanddat guovllus eai ge boraspiret. Guovža ii oba gula ge deike, lohká son.

Gáibádus

Otne deaivvada Deanu Guovddášbellodat iežaset bellodaga guovddáš politihkkáriiguin gos áigot ovddidit boraspirepolitihka hástalusaid.

– Mii gáibidit de ahte bellodat ferte garrasit bargat Stuoradikkis áššiin. Dálá boraspirepolitihkka lea áibbas boastut, dadjá Einar Johansen.

Ruhtajuolludeapmi

Einar Johansen muitala ahte ovdal go son beasai gielddastivrii, de ii gávdnon ruhta vuođđoealáhusfoanddas, ja nu lohpida maid fievrridit foandda viidásat.

 – Mun lea áŋgirit bargen juolludit ruđa vuođđoealáhusfondii juohke jagi, ja dál maŋemuš jagiid lea bargiidbellodat morihan ja lea ovttaoaivilis ahte ruhta ferte juolluduvvot. Vuođđoealáhusfoanda lea dehálaš ja dasa ferte juolluduvvot ruhta ain boahtteáiggis, lohká Johansen.

Lassijuolludeami addán

Deanu sátnejođiheaddji ja Bargiidbellodaga sátnejođiheaddjeevttohas, Frank Martin Ingilæ, ii loga Einar Johansena fievrridit rivttes dieđuid.

– Mii leat jahkásaččat juolludan ruđa vuođđoealáhusfondii, ja maŋemuš jagiid leat addán lassijuolludeami. Leat duođaš bargan ovddidit eanandoalu ja guolásteami gielddas, lohká Ingilæ.

Ovttaoaivilis boraspirepolitihkain

Boraspirepolitihkkii lohká Frank Ingilæ iežas ovttaoaivilis Guovddášbellodagain, boanddat ja boazodoalu galget bisuhuvvot ja boraspirenálli ferte geahpeduvvot.

– Boraspiret dagahit stuorra vahága ja váldet stuorra oasi badjelbáhcagis. Ii leat dohkálaš ii veahá ge dálá boraspirepolitihkka, lohká Ingilæ.