Tråante 2017 doaluin Troandimis rámpui Eanandoalloministtar bohccobierggu «bálvváid sisa». Doppe lea lihkká «čáhppes balva» mii bieguha ja vuorjá boazoealáhusa. Dan birra ii gárron ministtar jietnadit maidge.
Disdaga lágidii Matprat biebmoráhkadangilvvu masa Norgga Boazosápmelaččaid Riikkasearvvi (NBR) ovdaolmmoš, Ellinor Marita Jåma ja eanandoallo- ja biebmominister, Jon Georg Dale searvvaiga. Soai gilvaleigga goappás lea njálgát gordon bohccodeahkki.
Dan oktavuođas rámpui ministtar bohccobierggu máilmmi buoremus borramušávnnasin. Muhto, go veahá eambbo galggai vástidit boazodoalu birra, de šattai humuheapme.
Buoremus biergu
Dale rámpui boazosápmelaččaid go leat nu buori barggu dahkan dáid jagiid, ja man issoras buorre kvalitehta bohccobierggus dál lea .
Son logai boazodoallit leat buorebut buvttadišgoahtán bohccobierggu, mii lea dehálaš, vai olbmot besset oastit ja máistet dan.
Dan son lohká vuohttán dál Troandimis ahte olbmuin lea stuora beroštupmi máistet, go lávvu Troandima guovddažis gos fállet bohccobierggu lea leamaš spagga dievva.
Govven: Nils Johan Vars
– In kommentere
Go Dale lei geargan rámideame bohccobierggu, de jearaimet movt ministtar oaidná dan go doppe leat lihkká boazodoallit geat sáhttet geavvat heaitit boazoealáhusain, vaikke ministtar rámpo bohccobierggu olles riikii, ja namuheimmet erenoamážiid Jovsset Ánte Sara ášši mii dál lea diggevuogádagas.
– Mun in kommentere go ášši lea diggevuogádagas, lohká son.
– In dan ge kommentere
Ávvira mielbargi háliidii diehtit man olu bohccuid oaivvilda ministtar ahte boazodoallis fertejit leat vai galgá birget.
– Na in mun sáhte dan ge kommenteret, lohká son.
– Eai go ministaris leat makkárge oaivilat man olu bohccot fertejit leat boazodoallis, go dus han lea váldoovddasvástádus boazoealáhussii?
– Mun in kommentere boazologuid dál go diet boazolohkoášši lea diggevuogádagas, lohká son.
Govven: Nils Johan Vars
Bohccobiergu vuolgá boazodoallis
NBR ovdaolmmoš, Ellinor Marita Jåma, lohká ahte dát stuora beroštupmi maid bohccobiergu dál lea ožžon Tråante 100-jagi ávvudeami oktavuođas, dat han ii livčče vejolaš boazodolliid haga.
– Bohccobiergu han vuolgá boazodoallis, ja boazodoallis ferte birgejupmi. Muđui in sáhtáše mun dáppe gilvalit ministtarin goabbá ráhkada buoret borramuša bohccodeahkis, lohká son.
Divádit oažžut vulos
Jåma maid geassá ovdan ahte dál go boazosápmelaččat leat unnidan ealuid, de lihkká eai leat čoavdásan hástalusat nu go sisabahkkemat boazoguohtunguovlluide ja boraspirevahágat.
Danin lea su mielas erenoamáš dehálaš dál ahte eiseválddit ráhkkanit dasa, ja álggos vuos geahpedit boazodollui divadiid vai galgá sáhttit buohtastahttit eanandoaluin.
– Mii fertet sihkkarastet boazodolliid dili dál, ja vuosttaš livččii juo divadiid fievrruide oažžut seamma dássái go boanddain lea, lohká Jåma.
NBR lea ge gáibidan šiehtadallamiid finánsadepartemeanttain divadiid birra.
Ruđa birra sáhka
Eanandoalloministtar ii sáhttán lohpidit maidege Jåmai.
– Dás lea dieđusge ruđa ja bušeahta birra sáhka, muhto mii áigut geahčadit makkár vejolašvuođat leat, lohká ministtar.
– Don leat ieš boanda, ja várra ipmirdat makkár hástalusat leat investeremiid dáfus boazodoalus?
– Diehttelasat mun ipmirdan dan, ja dieđán makkár hástalusat leat. Lihkká in sáhte dadjat eará go ahte mii fertet oaidnit, lohká ministtar vel loahpas.
