Mingá vuosttaš siŋgel

Juoigi Iŋgá-Máret Gaup-Juuso joavku Mingá almmustahttá vuosttaš siŋgela. Bihtá namma lea «Andte». Dat lea Iŋgá-Máret vielja Andte Gaup-Juuso luohti. Andte šattai dovddusin go vuittii Big Brother duohta-tv-gilvvu 2014:s. Bihtás ovttastuvvá luohti ja ođđaáigásaš elektrovnnalaš pop-musihkka. Siŋgela almmustahttá Tuupa Records Oy, Suoma áidna skearrolágádus, mii jeavddalaččat almmustahttá sámemusihka.

Luohti dehálaš oassi sámi árbevierus – cd-skearru boahtimin
Iŋgá-Máret Gaup-Juuso mielde luohti lea hui dehálaš oassi sápmelaččaid árbevierus ja eandalii Suoma bealde leat dušše moadde juoigi, geat juiget almmolaččat. Gaup-Juuso boahttevaš cd-skearrus galget leat sihke árbevirolaš ja ođđaáigásaš luođit.
– Lean leamašan aktiiva juoigi jo mánnávuođa rájes. Skearrustan háliidan buktit ovdan nana juoigama, mii duođaid vuolgá dovdduin, muitala Gaup-Juuso.

Vuosttaš cd-skearru dovddus artisttas
Vaikke boahttevaš cd-skearru lea Iŋgá-Máret Gaup-Juuso vuosttaš, ii son liikká leat ođđa namma sámi kultursuorggis. Juoigama lassin son lea neaktán Beaivváš-teáhtera ja Norgga našunálateáhtera čájálmasain. Son lea maiddái juoigan Monaco furstapárrii ja Norgga gonagaspárrii. Ruoŧa gonagasbearrasii son loaiddastii ovttas Eurovision lávllagilvvu vuoitin Loreeniin.

Pop-musihkka ja árbevirolaš luohti
Cd-skearru buvttada Roope Mäenpää. Son lea dovddus earret eará guhkes ovttasbarggustis Niillas Holmbergiin. Mäenpää vástida maiddái eanáš skearru šuoŋain ja heiveheamis. Son dadjá ahte skearru musihkka ovttastahttá dálá pop-musihka ja luođi roavvan ja albman.
– Mu mielas lea dehálaš ahte luođi aitosaš fápmu ii biliduvvo, nu ahte dat šaddá reformerejuvvot dálá áigái. Luohti dušše sirdojuvvo birrasii, mii lea ráinnas ja goittot gitta dán áiggis, gávnnaha Mäenpää.

Mingá galgá maid čuojahit Heahtá Márjjábeivviin ihttin, lávvordaga. Dát konsearta lea Heahtá hoteallas.