-Almmuhus-
-Almmuhus-
OĐĐASAT – Min searvvis leat dál sámegielnamat

– Min searvvis leat dál sámegielnamat

-

-

Ođđadárogiela nuoraidsearvvi riikkačoahkkin mearridii geavahišgoahtit maiddái sámegielnamaid

Riikkačoahkkimis njukčamánus mearridii ođđadárogiela nuoraidsearvi geavahišgoahtit maiddái davvi-, julev ja máttasámegiel nama searvái. Dasa lassin mearridedje maiddái kveanagielat nama geavahišgoahtit.

 – Dáinna lágiin dovddastat gielalaš máŋggabealátvuođa, dadjá Norgga Giellanuoraid ođđa jođiheaddji Synnøve Marie Sætre.

 

Njuolggadusaide vuođđuduvvon

Nuorat digaštalle olu giellaáššiid riikkačoahkkimis njukčamánus Oslos. Earret eará meannudii organisašuvdna geavahišgoahtit sámegiel ja kveananamaid searvái. Namat leat vuođđuduvvon sierra paragráfas organisašuvnna njuolggadusain.

Ovttastusa namma lea Norsk Målungdom dárogillii, Vuona Giellanuora julevsámegillii, Nöörjen Gïelenoerh máttasámegillii, Norgga Giellanuorat davvisámegillii ja Norjan Kielinuoret kveanagillii, čuožžu njuolggadusain.

 

Guhká bargan

Ođđa jođiheaddji Synnøve Marie Sætre mielas dát nanne Norgga giellamáŋggabealátvuođa.

 – Bargagođiimet áššiin badjel jagi áigi. Dalle meannudii okta báikkálaš searvi mis, Biergunstudentaj ådådárogiellasiebrre, nama máŋgga gillii. Dan rájes leat bargan dan ala ahte olles organisašuvdna oažžu sullasaš namaid, dadjá Sætre ja muitala searvvi dárkilit bargan áššiin.

 

Ovttasráđiid hábmen

Namaid leat hábmen ovttasráđiid Noereh sámenuoraidsearvvi ovddasteddjiiguin ja Tromssa Universitehta giellaolbmuiguin. Kveananama dárkkistii ges kveana gielladiggi, Kielitinka.

 – Leamaš olu bargu, muhto seammás leat olu oahppan das. Dárogillii dadjat «målungdom», muhto mo heiveha «mål» sáni? Dat iešguđet namat leat čoavdán dán iešguđet ge ládje ja nu lea juohke namma erenoamáš, dadjá son.

 


DUĐAVAŠ: Noereh jođiheaddji Helge Ravna.
Preassagovva

 

Ožžot doarjaga Noereh-searvvis

Noereh jođiheaddji Helge Ravna lea ilus nammameannudusain.

 – Lea hui somá gullat ahte Norgga Giellanuorain leat dál sámegielnamat. Sámenuorat vásihit ahte sin giella hárve lea oidnosis stuorraservodagas. Go meannudit sámegielnamaid de dat čalmmustahttá sámegiela, dadjá son.

Son deattuha ahte Giellanuorat leat meannudan nama golmma sámegillii.

 – Go dasa lassin válljejit geavahišgoahtit davvi-, julev- ja máttasámegielnamaid de dat čájeha ahte sii leat buorit ovttasbargoguoimmit Norgga giellamáŋggabealátvuođa seailluheamis. Dát lea buorre iniatiiva, dadjá Ravna Giellanuoraid preassadieđáhusa bokte.

- Advertisement -
-Almmuhus-