-Almmuhus-
-Almmuhus-
OĐĐASAT– Miljovnnain ii sáhte loktet gelbbolaš­vuođa sámi mánáid­gárddiin 

– Miljovnnain ii sáhte loktet gelbbolaš­vuođa sámi mánáid­gárddiin 

-

-

Eai buohkat leat nu duđavačča ráđđehusa juolludemiin, earret eará  Norgga Sámiid Riikkasearvvi Sámedigge áirras Kristin Ørsnes Sara. Son deattuhii sárdnestuolus ahte stáhta ovttain miljovnnain ii sáhte loktet 50 sámi mánáidgárddi gelbbolašvuođa go dat ii juolo gosage. 

Mearkkašumi lasáhus: Ráđđehus lea sin reviderejuvvon 2022 nationálabušeahtas evttohan juolludit dušše 1 000 000 kruvnna ovdánahttit sámi mánáidgárddiid bargiid gelbbolašvuođa.  Sámediggi čujuhii áššis 23/21 ahte livčče lean dárbu 6.6 miljovnna kruvdnii ja dat vuorjašuhttá Sámedikki go eiseválddiin ii oro áigumuš ovdánahttit dan suorggi. Sámediggi čujuha ahte ovttain miljovnnain kruvnnain ii leat vejolaš loktet 50 sámi mánáidgárddi bargiid gelbbolašvuođa. 

Norgga Sámiid Riikkasearvvi áirras, Kristin Ørsnes Sara, doalai sáhkavuorus eatnigillii, mearkagillii, ja čujuhii dan ovtta miljovnna kruvdnii maid ráđđehus lea evttohan juolludit sámi mánáidgárddiide. 

DIEVASČOAHKKIN SÁMEDIKKIS: Sámediggi meannudii reviderejuvvon bušeahta ovdal geasseluomu 2022. Govva: Astrid Helander
DIEVASČOAHKKIN SÁMEDIKKIS: Sámediggi meannudii reviderejuvvon bušeahta ovdal geasseluomu 2022. Govva: Astrid Helander

– Vásihan dan miljovnna ráđđehusas dego ándagassii atnumin ja sámi mánáid bilkideapmin go eai evttohan juolludit dan 6-7 miljovnna kruvnna maid Sámediggi lea dáhtton gelbbolašvuođaloktemii. Dat livčče lean ávkin buot sámi mánáide, maiddái sámi mánáide geain lea lossa gullu, lohká Kristin Sara, gii bargá freelance mearkagiellatulkan ja bealjehis ja čalmmehis olbmo láidesteaddjin. 

Muitala son lea gal beahtahallan ráđđehusa evttohuvvon juolludeapmái. Lohká Sámediggi bargá nu bures go sáhttá stáhta ruhtajuolludeami ektui. Iige loga áddet mo Sámediggi galggašii nákcet dainna vátna ruđain loktet gelbbolašvuođa 50 mánáidgárddis ja ossodagain. Su mielas galggašii Sámediggi roahkkadit gáibidit dáid ruđaid, muđui ii sámeláhka goassege ollašuva. 

Ráđđehusain gulahallat e-poastta bokte

Ovdal go jienastuvvui, de láhttestii Sámedikki ráđđelahttu Runar Myrnes Balto, de leš oaidnit maid dálá ráđđehus dahká «eksámenbeaivvi», mii lea go boahtte jagi stádabušeahtta almmuhuvvo čakčat.

Guovddášbellodaga sámediggeáirras Elisabeth Erke lohká Sámedikkis lea uhccán ruhta, menddo olu áigi manná digaštallat geas lea masa ovddasvástádus.

– Mii guoská sámi mánáidgárddiide, de leat stuorra vuordámušat ahte Sámediggi gavistivčče eanet daid juolluduvvon 570 miljovnna kruvnnas mánáidgárddiide. Sámediggi juolluda maid sáhttá, muhto lea dárbu eanet ruhtii vai sáhtášii nannet fálaldagaid sihke sámi mánáidgárddiide, skuvllaide, alitohppui ja oahpponeavvuide ja bargiid hahkamii, lohká Elisabeth Erke.

Govva: GULAHALLAT RÁĐĐEHUSAIN: Guovddášbellodaga sámediggeáirras Elisabeth Erke ja Romssa ja Finnmárkku ovddeš fylkkadiggeáirras, dál Sámedikki  politihkalaš ráđđeaddi, Anne Toril Eriksen Balto.. Govva: Astrid Helander
Govva: GULAHALLAT RÁĐĐEHUSAIN: Guovddášbellodaga sámediggeáirras Elisabeth Erke ja Romssa ja Finnmárkku ovddeš fylkkadiggeáirras, dál Sámedikki  politihkalaš ráđđeaddi, Anne Toril Eriksen Balto.. Govva: Astrid Helander

Ávvir jearrá mo son gulahallá Norgga ruhtadanministariin Trygve Slagsvold Vedumiin (Guovddášbellodat)? 

– Mun čálán e-poasttaid. Mii bargat systemáhtalaččat ráđđehusa ja Stuorradikki vuostá. Mii dieđihat čálalaččat áššiid birra maid mii háliidat vuoruhuvvot, čilge Guovddášbellodaga áirras Sámedikkis, Elisabeth Erke.

 – Mii fertet ovttasráđiid bargat, Sámediggi ja ráđđehus. Hurdal-julggaštusas leat giella- ja kulturlokten mielde, maiddái oahpponeavvut. Sámediggi lea dál ráđđádallamin oahpahuslágain sihkkarastin dihtii sámi mánáid vuoigatvuođa sámi oahpahussii, lohká Romssa ja Finnmárkku ovddeš fylkkadiggeáirras, dál Sámedikki  politihkalaš ráđđeaddi, Anne Toril Eriksen Balto.

-Almmuhus-