-Almmuhus-
OĐĐASATMiljovnna kruvnna bissehit ruošša­luosa leavvamis

Miljovnna kruvnna bissehit ruošša­luosa leavvamis

-

-

Ruđat juolluduvvojit hoahppomearrádusain eastadit amas guollešlája, ruoššaluosa,  leavvamis Norgga čázádagaide. 

Ruoššaluossa (latiinnagillii: Oncorhynchus gorbuscha, dárogillii pukkellaks) lea amas guollešládja mii leavvá jođánit ja mii sáhttá vahágahttit norgalaš guollešlájaid ja biologalaš máŋggabealatvuođa. Guolástan- ja mearrabiebmoministtar juolluda danin miljovnna kruvnna hoahppodoaibman ruoššaluosa eastadeapmái.  

– Dat ahte ruoššaluossa márrá Norgga rittuide lea guhkitáiggi leamaš vuorjašuhtii sihke dávdanjoammuma ektui ja guollebiebmanrusttegiidda. Mun háliidan veahkehit birashálddahusa ja báikkálašolbmuid jávkadeames ruoššaluosa, vai eanet olbmot sáhttet searvat bivdimii, lohká guolástus- ja mearraborramušministtar Odd Emil Ingebrigtsen preassadieđáhusas.

Vuoruhit Deanučázádaga

Birasdirektoráhta lea bálkáhan Norgga Luonddudutkaninstituhta (NINA) jođihit plánenbarggu, ja dat leat evttohan doaimmaid ovttasráđiid Romssa ja Finnmárkku stáhtahálddašeaddjiin. 

Birasdirektoráhta doarju jagi 2021:s ruoššaluosa eastadanbarggu doaibmaplána ektui. Finnmárkku jogat vuoruhuvvojit. Biddjo erenoamáš deaddu jávkadit ruoššaluosaid Deanučázádagas. 

– Ruoššaluossa lea amas guollešládja, mii ii gula lunddolaččat Norgga jogaide ja čáziide. Mii leat dál árvvoštallame Birasdirektoráhta evttohusa maid leat ráhkadan eastadanbargui. Dát bargu ii váikkut dušše Norgga vuonaide ja jogaide, muhto sáhttá maid buorrin eará osiide Eurohpás, lohká Dálkkádat- ja birasministtar Sveinung Rotevatn.

-Almmuhus-