Joint Viking 2017 militearahárjehallan álgá vuossárgga, dat sáhtte váikkuhit johtolahkii E6 geainnus gaskkal Álttá ja Leavnnja ja fylkkageainnu 98:s gaskkal Leavnnja ja Bissojoga.
Joint Viking 2017 militearahárjehallan álgá vuossárgga, dat sáhtte váikkuhit johtolahkii E6 geainnus gaskkal Álttá ja Leavnnja ja fylkkageainnu 98:s gaskkal Leavnnja ja Bissojoga.
Hárjehallama oktavuođas vudjet militeara fievrruiguin dáid geaidnoráiggiid, ja rasttildit maiddái daid.
Dasa lassin fievrredit olu militeara rusttegiid dieid guovlluin.
Johtaleaddjit fertejit rehkenastit guhkit ádjánit, ja muhtumin sáhttá geaidnu oanehis botta oalát giddejuvvot.
Šilttat čájehit gos hárjehallan lea.
– Dát mearkkaša ahte olbmot geat galget joksat girdiid, buohcciviesu diimmuid dahje eará dehálaš earániid, berrejit rehkenastit guhkit ádjánit. Dasa lassin lea maid dehálaš vuodjit várrogasat ja atnit muittus ahte sáhttá leat militeara johtolat ja stuorra militearafievrrut geainnu alde, lohká Stáhta geaidnodoaimmahaga ossodatdirektevra Finnmárkkus, Oddbjørg Mikkelsen.
Čájehit 175.no siiddus
Geaidnojohtolatguovddáš addá eambbo ja dárkilat dieđuid das makkár guovlluide hárjehallan váikkuha eanemusat, dan dahket beaivválaččat 175.no siiddus.
NRK maid dieđiha juohke iđit dán birra.
Dál leat jo moadde beaivvi fievrredan militearafievrruid ja -rusttegiid guvlui.
Hárjehallan álgá vuossárgga ja joatká gitta njukčamánu 15. beaivái.
Gulahallet
Vai heahteveahkkefievrrut eai galgga hehttehuvvot de leat ráhkadan sierra dieđihanrutiinnaid dáid hárrái.
– Johtolatsihkkarvuohta galgá vuhtiiváldot. Danne lea Stáhta geaidnodoaimmahagas maid váldi giddet geainnuid oalát, jus dasa šattaš dárbu, lohká Oddbjørg Mikkelsen.
Olle hárjehallanáiggis galget Suodjalus ja Geaidnojohtolatguovddáš dávjá gulahallat.
Eastadit bilidemiid
Stáhta geaidnodoaimmahat lea sierra šiehtadusa bokte Suodjalusain, šiehttan ahte galget nu bures go sáhttet garvit bilideames geainnuid.
Váldonjuolggadusa lea ahte bealtabiillat galget geavahit gummebealttaid go vudjet geainnuid mielde.
Jus geainnut, geaidnoáiddit, šilttat, dihkkát dahje eará diŋggat billašuvvet hárjehallama geažil, de galgá Suodjalus daid buhtadit.
Suodjalusa dieđuid Joint Viking 2017 birra logat dáppe.
