-Almmuhus-
SMÁVVAOĐĐASATMikkelsen galleda Hamara

Mikkelsen galleda Hamara

-

-

Ovttasbargu, sámi kultuvra ja sámi cealkinfriddjavuohta leat muhtin ráje fáttáin mat leat sámediggeráđi Mikkel Eskil Mikkelsena (NSR) prográmmas go lea Hamaris njukčamánu 23. ja 24. beaivvi.

 Mikkelsen oasálastá njukčamánu 24. beaivvi semináras mas fáddán lea vealaheapmi ja árgabeairasisma. 

– Vealaheapmi ja cielaheapmi lea stuorra servodatváttisvuohta, ja dađi bahábut lea dat maid oahpis ollugiidda sámi servodagas. Dat lea áittan demokratiijai ja olles servodat ferte áŋgiruššat ja vuosttaldit dan. Danne lean ilus go fylkkasuohkan bidjá fuomášumi dasa, dadjá Mikkelsen.

Semináras besset guldaleaddjit vásáhusaid ja muitalusaid vealaheami birra, ovdal go sámediggeráđđi ja Kultur- ja dásseárvodepartemeantta stáhtačálli Gry Haugsbakken oassálastiba ságastallamis mo sáhttá buoridit cealkinkultuvrra.

Ovttasbargu

Njukčamánu 23. beaivvi álgá čoahkkimiin gaskal Sámedikki ja Innlandet fylkkasuohkana, mas fáddán lea ovttasbargošiehtadus mii doaibmagođii 2022 rájes. Šiehtadusa áŋgiruššansuorggit leat earret eará sámegiella, regionála plánen ja areálahálddašeapmi, oahpahus, kulturovttasbargu, kulturmuitohálddašeapmi, ealáhusovdánahttin ja boazodoallu.

– Lea dehálaš deaivvadit singuin geain mis leat ovttasbargošiehtadusat vai mii nannet sihke ovttasbarggu ja ovttasdoaibmama. Lea hui mávssolaš vuoruhit doaimmaid mat leat buorrin sápmelaččaide geat ásset dán guovllus ja mun illudan deaivvadit fylkkasuohkaniin, dadjá sámediggeráđđi Mikkel Eskil Mikkelsen.

Máttasámi forum

Seamma beaivvi deaivvada Mikkelsen Máttasámi forumiin. Máttasámi foruma ulbmil lea nannet gelbbolašvuođa, hukset oktavuođaid ja nannet Stáhtahálddašeaddji doaimmaid máttasámi giela, kultuvrra, ealáhusa ja dearvvašvuođasurggiin.

Hamar kulturviesus rahppo johttičájáhus «Hvorfor er du så hjulbeint?». Čájáhusa fáddá lea árgabeairasisma, ja dan leat ráhkadan Trøndelága Sámi ráđđi, hábmejeaddji Katarina Blind ja Falstadguovddáš. Sámi kultureahket maid čalmmustahttá Mjøsa ja biras sámesearvvi 15-jagi ávvudeami ja sámi artista Kajsa Balto doallá konseartta.

– Illudan sakka albma ávvoeahkedii Hamar kulturviesus, dadjá Mikkelsen.

-Almmuhus-