-Almmuhus-
-Almmuhus-
-Almmuhus-
OĐĐASATMii mearrida maid jienastat?

Mii mearrida maid jienastat?

-

-

Lea go válgagižžu, njunušolmmoš vai bellodat? Viđas vástidit!

Ávvir lea fitnan Guovdageainnus jienastanbáikkis gullame mii leat maid jienasteaddjit jurddašit go galget jienastit.

Lea go olmmoš gii ovddida bellodaga gii mearrida maid jienasta, vai leat go válgalohpádusat mat leat váikkuhan?

 

Lemet Mihkkal Hætta.

– Dat mii mearrida maid jienastan lea bellodat. Jus váldit Bargiidbellodaga ja Gurut, jus mu mielas lea Bargiidbellodat mii bargá buriid bargguid, de jienastan sin. In geahča makkár olbmot leat njunnošiin, geahčan bellodaga mii munnje heive eanemus.

– Lean čuvvon mielde maid politihkkarat leat lohkan dál ovdal válggaid, ja lean ožžon oainnu maid sáhtán jienastit. Dat lea váikkuhan maid jienastan.

 

Inga Marianne Lango, Niillas-Mihkkal Iŋgá.

– Lean áigá mearridan gean jienastan, obbalaččat lean geahččan bellodatpolitihka, go dan dat čuvvot oainnat. Dan maid dál lohket ovdal válgga, jáhkán dat manná biekka mielde. Dat mii mearrida maid mun jienastan lea gos orru. Daid geaid jienastan.

– Ferte obbalaččat jurddašit politihka, in jáhke okta olmmoš mearrida doppe maide. Movt heive midjiide sápmelaččaide ja boazosápmelaččaide. Mii fertet davvin jurddašit gos mii orrut, ja ahte mis lea boazodoallu maid fertet gáhttet.

 

Ole Kristian Aho.

– Mun in jurddaš nu olu makkár politihkkarat leat, jurddašan eambbo bellodagaid politihka birra. Munnje lea nuoraid boahtteáigi dehálaš, ii duššo báikkálaččat, muhto olles Norggas.

– In leat vel čuođi proseantta sihkar gean galggan jienastit, lean dál vázzime bellodagaid bevddiid mielde gullame maid bellodagat lohket iežaset politihka birra. Skuvladebáhtta lea maid veahkehan mearridit makkár bellodaga mus lea miella jienastit. Soaitá jus dál guldalan dáid politihkkariid, soaittán de mearridit.

 

Sunna Utsi.

– Lea mu eadni gii lea mearridan maid jienastan, son lea politihkar ja háliida ahte jienastan su! reašká son.

– Ii leat mearridan, muhto son lea ávžžuhan mu jienastit su. Lean geahččalan valgomata eske, muhto in jáhke mun gergen dainna ovdal šadden vuolgit. Lean áigá mearridan maid jienastan, in leat válgagiččus rievdadan oainnu.

 

Johan Heaika Eira Heahtta.

– Lea oktasaš oassi makkár olbmot bohtet bellodagaide, ja maid bellodagat meinejit mii mearrida maid jienastan. Lea hui dávjá ahte politihkkarat dadjet hui olu, muhto go geahččá makkár olbmot mannet bellodagaide, de oaidná veahá eambbo maid dat meinejit ja barget.

– Jus mun dovddan muhttima, geainna in leat ovttaoaivilis. Ja jus manná muhtun bellodahkii mii lea hui earálágan go dat olmmoš, de ipmirdat ahte lea juoga mii ii leat áibbas riekta. Jáhkán deháleamos lea maid oaivvildit friddjavuođa birra, luonddus ja sosiálaeallimis. Dat lea buot deháleamos.

– In leat vuos jienastan, ja lean oalle sihkar maid meinen jienastit. Jáhkán mun mearridin moadde mánu áigi, ja šadden sihkkareabbo ja sihkkareabbo go beaivvit manne. Lea doallan dat bellodat.

-Almmuhus-