-Almmuhus-
OĐĐASAT– Mii leat ain áidna joavku Finnmárkkus

– Mii leat ain áidna joavku Finnmárkkus

-

-

Guovtti jagis lea dát joavku 24 geardde fállan veahki olbmuide geat leat heahtedilis. – Eat jáhkkán ná olu dáhpáhusaid gártat, muitala Marit Helene Eira.

– Gárte mihá eanet dáhpáhusat go maid jáhkiimet dalle go álggiimet. Čájehuvvo ahte lea stuorra dárbu midjiide dáppe Mázes ja ahte olbmot leat liikon go mii sáhttit fállat veahki, muitalaMarit Helene Eira.

Son jođiha Máze vuosttašveahkkejoavku mii ásahuvvi miessemánus guovtti jagi áigi ja doaibmagođii suoidnemánus seamma jagi. Dan rájes lea joavku veahkehan heađálaččaid 24 geardde.

 

Ášši vuolábealde beasat oaidnit mo manai dalle go Ivan Olsen, Álttás eret, časkkahalai alddagasii. Son lei Mázes ja Máze vuosttašveahkkejoavku dat dikšo su dassái go ambulánsa joavddai.

 

Guhkes gaskkat dagahit dárbbu

Ulbmil lei hábmet joavkku mii sáhttá čađahit vuosttaš veahkki heahtedilis, ja leat pasieanttaid luhtte dassái go buohccibiila joavdá. Máže lea 45 minuvtta eret lagamus ambulánssas, mii gávdno Guovdageainnus.

– Dat lea guhkki lagamus ambulánsii ja danne lea dárbu midjiide. Pasieantta oažžu mis álgodivššu dassái go ambulánsa joavdá, čilge jođiheaddji.

Eira gal jáhkká eará báikkiide Finnmárkui, maid leat dárbbu ásahit dákkár joavkkuid.

– Jua, dat gullo ahte lea dárbu. Dat guhkes gaskkat mat dáppe leat, dagahit dárbbu, dadjá son ja muitala ahte jus eará báikkiin háliidit dákkár joavkku ásahit de berrejit váldit oktavuođa Norgga Áibmoambulánssa vuođđudusain (Stiftelsen Norsk Luftambulanse).

 

Norgga Áibmoambulánsa Vuođđudus (NÁV) álggahii prošeavtta man gohčodedje «Dan botta go vuorddát ambulánssa», mii lea boaittobeale báikkiid várás. 

Dán prošeavtta oktavuođas lea vuođđudus oahpahan 1500 buolličaskadeaddji, badjel 100 gieldda leat searvan prošektii.

Vuođđudus háliidii ásahit prošeavtta maiddái Finnmárkui ja fálle dan Mázii. Prošektii gullá guokte beaivásaš oahpahus, gos oasseváldit ohppet heahteveahki addit, dasa lassin ožžot maid váibmomášiinna, oksygenarusttegiid ja vuosttašveahkkelávkka.

Dasa lassin addá vuođđudus ođđa rusttegiid ja hárjehallamiid dárbbu mielde, guokte jagi das rájes go álggahit joavkku. Prošeakta lea nuvttá gielddaide ja vuosttašveahkkejoavkkuide.

 

Čoahkkanit mánnosaččat

«Dan botta go vuorddát ambulánssa» prošeakta lea rievtti mielde fálaldat gielddaid buollinčáskadeddjiide, muhto sáhttá maid fállot vuosttašveahkkejoavkkuide. Mázes válljejedje ráhkadit vuosttašveahkkejoavkku masa gullet 12 olbmo, sihke buollinčáskadeaddjit ja eará giliolbmot.

– Ole Anthoni Hætta, guhte gullá min jovkui, dat áŋgirušai ásahit dákkár joavkku Mázii, nu ahte su mii fertet giitit dan ovddas. Son lea ambulánsavuoddji, ja láve čohkket min sullii oktii mánus ja veahá oahpahit min heahteveahkkebarggu birra, čilge Eira.

 

Nuvttá barget

Joavku ii oaččo ruđalaš doarjaga gostege, eai ge joavkku miellahtut oaččo bálkká bargguset ovddas. Sii barget áibbas eaktodáhtolaččat ja veahkehit heađálaččaid go lea vejolaš. Dán rádjai lea dát doaibman bures, ja juohke háve go lea leamaš dárbu de lea muhtin joavkkus boahtán báikái.

Vuosttašveahkkejoavku lea dál hutkan iešguđet vugiid mo sáhtašedje hahkat ruđalaš doarjaga doibmii. Joavku lea aiddobeliid bargan Suodjalusa ovddas, dán barggu ovddas ožžot dan mađe máksot ahte sihkkarastet joavkku miellahtuid guokte boahttevaš jagi. Dát lea buorre álgu ja movttiidahttá ain hutkat ruđalaš čovdosiid.

– Dál mis lea dan mađe čoggon ruhta ahte nagodat doaibmat ainjuo guokte jagi, ja mis lea jáhkku doaibmat guhkit maid, čilge jođiheaddji.

Joavku oažžu maid buori veahki NÁV:s, suohkandearvvašvuođabálvalusas, ambulánsabálvalusas, AMK:s, 110 guovddážis, UNN:s ja Finnmárkku buohcciviesus. Dán dihte háliida joavku joatkit dáinna dehálaš bargguin.

 

 

-Almmuhus-