Sámedikkeráđđi gažada skuvllaid kvaliteahta birra Sámedikki dievasčoahkkimis mii lea njukčamánus.
Dievasčoahkkináššis cuoiggoda stuora struktuvrralaš hástalusaid mat leat kvalitehtavuogádagas, earret eará nationála iskosiid ja ohppiidiskosiid mat eai čájet sámi ohppiid fágalaš ja sosiálalaš ovdáneami.
– Mis lea unnán diehtu ohppiid lohkan- ja čállinovdáneami birra, eatge dieđe movt sii loktet skuvllas. Mun balan ahte dat 30 proseantta heaitin sámegielfágain lea stuora váttisvuođa mearka, dadjá sámedikkeráđđi Mikkel Eskil Mikkelsen (NSR) preassadieđáhusas.
Ollu hástalusat
Mikkelsen ballá ahte nationála kvalitehtaovdánahttindoaimmat eai fátmmas sámi ohppiid skuvlafálaldagaid doarvái bures.
– Go eat dieđe maidege sámi ohppiid lohkan- ja čállinovdáneami birra dahje sosiála loaktima, de lea duođai váttis ovdánahttit sámegieloahpahusa, čállá son.
Kvalitehtaárvvoštallanvuogádat, mas earret eará leat nationála geahččaleamit, ohppiidiskkadeamit ja kártengeahččaleamit, dat digaštallojuvvo dávjá našuvnnalaččat. Sámegielat ohppiin lea eará vuolggasadji go eará ohppiin. Ovdánaneavttut leat áibbas earáláganat.
– Sámegielat oahpponeavvuid, nu go digitála oahpponeavvuid ja deaddiluvvon teavsttaid, ii báljo fidne. Stuora oassi sámegieloahpahusas čađahuvvo gáiddusoahpahussan. Hástalussan gártet heajos hospiterenortnegat, deaddiluvvon oahponeavvut, ja dasa lassin váilot oahppan oahpaheaddjit, oaivvilda ráđđelahttu Mikkelsen.
Dehálaš gávdnat buriid čovdosiid
Dál eai leat olu sámi oahppit geat čađahit nationála iskosiid ja eksámeniid. Dat mielddisbuktá heajut kvantitatiiva máhttovuođu sámi ohppiid birra, ja personsuodjalus iige fuolahuvvo doarvái bures.
– Deháleamos bargu ovddasguvlui lea gávdnat buriid čovdosiid hástalusaide, nugo áigeguovdilis loguid ja dieđuid maid beassat ávkkástallat kvalitehtaovddideamis, lohká Mikkelsen.
Mihttu
Dál galgá okta bargojoavku geahčadit kvalitehtabarggu boahttevaš jagiid. Mikkelsen lea čielggas das ahte sámi ohppiid sosiálalaš ja fágalaš loaktin skuvllas galgá guovddážis barggus, ja lea evttohan sámi áirasiid bargojovkui.
– Mu mihttu lea nannet kvalitehtaovddideami boahttevaš jagiid. Lea dehálaš kártet givssideami sámi ohppiid gaskkas, ja mihtidit kvalitehta sámegieloahpus, lohká Mikkelsen.
.
