– Mis ii leat ráđđi speallat min boahtteáiggiin, lohká Christina Henriksen (NSR-SáB) ja sávvá ovttajienalaš Sámedikki hilgut ruvkedoaimma Nussiris ja Gumpenjunis.
– Mis ii leat ráđđi speallat min boahtteáiggiin, lohká Christina Henriksen (NSR-SáB) ja sávvá ovttajienalaš Sámedikki hilgut ruvkedoaimma Nussiris ja Gumpenjunis.
Christina Henriksen ávžžuha buohkaid geat beroštit boahtteáiggis boahtit Sámediggái ja bidjat deattu politihkkariidda.
– Mun sávan ahte buohkat geat dorjot ealáhusaid rivttiid, ja geat háliidit gáhttet min vuonaid, buktet iežaset oaiviliid Sámediggái ja sámediggelahtuide, dadjá sámediggelahttu Henriksen.
Dehálaš ášši
Nussira ja Gumpenjuni ruvkedoaibmaášši galgá meannuduvvot Sámedikkis vuosttaš vahkku njukčamánus. ja dan oktavuođas lágida Sámedikki ealáhus- ja kulturkomitea rabas gulaskuddama Nussira ja Gumpenjuni ruvkedoaimma birra guovvamánu 29. beaivvi.
Henriksen lohká ášši leat dehálažžan sidjiide geat orrot Riehppovuonas ja lagasmus guovlluin, muhto lea maid dehálaš prinsihpalaš ášši olles sámi- ja dáččaservvodahkii.
– Mis ii leat ráđđi speallat min boahtteáiggiin. Eat sáhte dohkkehit ahte vutnii luitet ruvkebázahusaid eat ge sáhte dohkkehit mineráladoaimmaid sámi guovlluin dainna lágain mii dál lea. Mis leat garra vásáhusat go doaimmat mannet boasttu guvlui, ja mii fertet dál jurddašit ođđa vugiid, lohká Henriksen.
– Lea buorre vejolašvuohta dál leat mielde váikkuheame Sámedikki mearrádusa, lohká Henriksen.
Sáhkavurrui dieđihit
Son muitala maid ahte NSR/NSR-SáB sámediggejoavku doarju Sámediggeráđi oainnu Nussir ja Gumpenjuni ruvkedoaimma negatiivvalaš váikkuhusaid guolásteapmái, boazodollui, lundui, sámi kultuvrii ja servvodahkii.
Sii geat háliidit sáhkavuoru gulaskuddamis váldet oktavuođa Sámedikki hálddahusain. Lea maid vejolaš sáddet čálalaš evttohusaid. Buot čoahkkimat leat rabas čoahkkimat masa ožžot guldaleaddjit searvat.
