Poltiijat ráhkkanit vuolgit duoddarii ohcat dievddu gii sáddii heahtedieđu mánnodatiđida. Son lei manname Áhkkánjárggas Áltái čuoigga ja sus leat guokte beatnaga mielde.
Poltiijat ráhkkanit vuolgit duoddarii ohcat dievddu gii sáddii heahtedieđu mánnodatiđida. Son lei manname Áhkkánjárggas Áltái čuoigga ja sus leat guokte beatnaga mielde.
Finnmárkku politiijat dieđihit ožžon heahtedieđu dievddus gii lea čuoigame Áhkkánjárggas Áltái. Sus galgá leat bulkor ja guokte beatnaga maid fárus.
Dihtet gos dievdu lea
– Mii diehtit juste gos mii galgat ohcat, muitala politiija operašuvdnaguovddáža jođiheaddji Svein Erik Jacobsen Ávvirii.
Dievddus lei rusttet mainna son sáddii dađistaga GPS-dieđu vai su lagamuččat oidnet gos son lea. Sus lei maid heahteboallu mielde, man bokte politiijat ožžo dieđu.
Dievdu lea Davvii-Romssas eret, birrasii 25-jahkásaš ja lea goalmmát jagi studeanta Álttás.
Son galgá leat hárjánan leat okto meahcis, muhto son lea dál sádden heahtedieđu ja galgá leat gaskal Eaiboávžži ja Návuonbađa.
Heajos dálki
– Heahteveahkit dollejit Nállovári guora bajás Eaiboávžžis. Okta joavku lea leamaš ohcame, ja leat máhccan fas. Nubbi joavku lea fargga vuolgime ohcat, muitala operašuvdnaguovddáža jođiheaddji.
Sihke Suodjalus, Rukses Ruossa, Gádjunbeatnagat, Siviilasuodjalus, 110 ja politiijat leat gohččojuvvon Eaiboávžái.
Báikkis lea heajos dálki, ja lea váttis vánddardit duoddaris, muhto Jacobsen muitala ahte sii dihtet dievddu posišuvnna, nu ahte dihtet gos galget ohcat.
Ođđa veahka dolleme duoddarii
Vihtta skutera vuoddjájit Heastajávreluohkáid bajás. Leat viđas politiijain ja 11:s siviilasuodjalusas. Siviilasuodjalus lea diŋgon eanet skuteriid báikái.
Rukses Ruossa lea maid jođus, ja ruovttusuodjalus lea veahkkin.
– Seaking geahččalii ohcat, muhto fertii heaittihit heajos dálkki dihte, muitala ohcanjođiheaddji Håvard Martinsen.
Politiijat eai dieđe makkár dilis dievdu lea. Sus ii galgga dieđuid mielde leat mobiilatelefuvdna fárus, muhto heahteboallu.
– Dan maid diehtit lea ahte dievdu lei čuoigán Áhkkánjárggas juovlamánu 15. beaivvi ja lei jođus Áltái. Son lea hárjánan johtit duoddaris, ja sus leat ávdnasat fárus maiguin birge. Son lea ovdal leamaš meahcis dálvet, muitala Martinsen Ávvirii, ja lohká ahte ohcanveagas leat olbmot mielde geat leat oahppásat guovllus.
