Juohke njealját oahpaheaddji vuođđoskuvllas lea dievdu. Dál áigot oččodit eanet dievdduid váldit oahpaheaddjeoahpu.
– Mii áigut bidjat 10 miljovnna ruvnno doaimmaide vai oččodit eambbogiid oahpaheaddjeoahpuide, ja deattuhit earenoamážit dievdduid oččodit ohppui, lohká Dutkan- ja alit oahpahusministtar Iselin Nybø preassadieđáhusas.
Speadjalastit servvodaga
Máhttodepartemeantta lea bivdán OsloMet dutkiid guorahallat movt galget eanet dievdduid oččodit vuosttaš luohkás čihččet luohká oahpaheaddjeoahpuide.
– Mii dárbbašit eanet dievdooahpaheddjiid. Lea mihttu ahte oahpaheaddjeveahka galgá speadjalastit servvodaga gaskamearálašvuođa. Maiddái nuoramus oahppit berrejit oaidnit sihke nissoniid ja dievdduid oahpaheaddjerollain, lohká Nybø.
Nuoraide addit bargovásáhusa
Ođđa raporttas boahtá ovdan ahte árra vásáhus mánáiguin bargat lea dehálaš fáktor mii dahká ahte dievddut válljejit oahpaheaddjeoahpu. Dál leat eanet nieiddat go bártnit geat nuorran ožžot dán vásáhusa. Raporttas cuiggoduvvo maid ahte mánáin ovdána oaidnu makkár bargguide nissonat ja dievddut heivejit mii šaddá sohkabealstereotiipa ipmárdussan.
Dan logi miljovnnas galgá vihtta miljovnna geavahuvvot doaimmaide mat leat ođđa raporttas. Dasa lassin galgá vihtta miljovnna mannat universitehtaide ja allaskuvllaide oččodit eanet ohcciid geain lea gelbbolašvuohta.
Fáktá dievdduid ja oahpaheaddjeoahpu birra:
· Dál lea dušše juohke njealját vuođđoskuvlaoahpaheaddji dievdoolmmoš.
· Rekrutteren oahpaheaddjeohppui lea alit dásis dál go ovdal, muhto eai leat nu máŋga dievddu geat ohcet vuosttaš luohká gitta čihččet luohká vuođđoskuvlaoahpahussii. Dievdolohku njiejai dán jagi sis geat ožžo fálaldaga álgit 1-7 vuođđoskuvlaoahpaheaddjeohppui. 2018:s lei lohku 22,8 proseantta dievddut, ja 2019:s ges 19,8 proseantta.
· Dievddut geat ožžot oahpposaji 5–10 luohká oahpuide ja lektorohppui 8–13 lea gaskal 38 ja 41 proseantta, mii speadjalastá sohkabealjuogu alit oahpahusas.
