Norgalaččat borret sakka eanet ruotnasiid go ovdal, ja sohkargálvvuid leat unnidan. Dearvvašvuođadirektoráhtta vuorjašuvvá dattetge go borrat unnit guoli go ovdal.
Norgalaččat borret sakka eanet ruotnasiid go ovdal, ja sohkargálvvuid leat unnidan. Dearvvašvuođadirektoráhtta vuorjašuvvá dattetge go borrat unnit guoli go ovdal.
Norgalaččat borret unnit guoli go ovdal, ja erenomážit nuorat válljejit eret guoli, čájeha Dearvvašvuođadirektoráhta statistihkka mii muitala norgalaččaid borranvieruid birra.
Eiseválddit háliidivčče ahte norgalaččat boraše 20 proseantta eanet guoli 2021:s go dál, muhto guolleborran njiejai njeljiin proseanttain 2015 rájes 2016 rádjái.
– Lea hirbmat hástaleaddji ahte borrat unnit guoli, go guolis livččii dearvvašlaš vuodja ja eará dehálaš biebmoávdnasat, nu go judda ja D-vitamiidna. Dearvvašvuhtii livččii hirbmat dehálaš lonuhit biergomállásiid eret guliin oktii dahje guktii vahkkus, dadjá Dearvvašvuođadirektoráhta divišuvdnajođiheaddji Linda Granlund NTB:i.
Maŋimuš logi jagis lea norgalaččaid biergoborran lassánan gávcciin proseanttain.
Borrat eanet ruotnasiid
Borramušvierut čájehit maiddái ahte norgalaččat eai leat goassege borran nu olu ruotnasiid go dál.
Jagi 2000 rájes lea juohkehaš borragoahtán moaddelogi kilo eanet ruotnasiid jahkásaččat, dalle borai norgalaš gaskamearálaččat 59 kilo ruotnasiid.
Dál borrá norgalaš gaskamearálaččat 81 kilo ruotnasiid jahkásaččat, ja mii leat erenomáš váibmilat rušppiide.
Norggas leat maid borragoahtán eanet šattuid, dál borrá juohkehaš gaskamearálaččat 89 kilo šattuid ja murjjiid. Dat lea 20 kilo eanet go jagi 2000:s.
– Šattut ja ruotnasat leat buot deháleamos olbmo dearvvašvuhtii, dadjá Granlund.
Unnidan sohkkara
Olu jagiid leat eiseválddit áŋgiruššan vai norgalaččat boraše unnit sohkkara, ja dás leamaš ávki.
Jagi 2000 rájes lea juohkehaš unnidan sohkkara 27 kilos 16 kiloi jahkái.
Vaikke mii leat unnidan sohkkara, de oaivvilda direktoráhtta ahte norgalaš ain borrá menddo olu sohkkara.
– Lea hirbmat buorre go norgalaš borrá unnit sohkkara go menddo olu sohkkara geažil sáhttá buoidut ja oažžut sohkardávdda, dasa lassin billista sohkar bániid. Mii oaivvildit ahte eanemusat 10 proseantta energiijas maid borrat galgá boahtit sohkkaris, dál lea lohku 12 proseantta, lohká Granlund.
