-Almmuhus-
-Almmuhus-
OĐĐASAT– Mii bivdit ipmárdusa boazo­ealáhussii, boazu ii gierdda dál muose­huvvat

– Mii bivdit ipmárdusa boazo­ealáhussii, boazu ii gierdda dál muose­huvvat

-

-

Giđđa lea áigodat go olusat meahcástallet, muhto sátnejođiheaddjiguovttos bivdiba dál ipmárdusa ahte boazoealáhus lea rašes dilis. 

Dás ovddasguvlui bohtet olusat vánddardit meahcis, ja dan oktavuođas bivdiba sátnejođiheaddjit Guovdageainnu suohkanis ja Kárášjoga gielddas álbmoga vuhtiiváldit boazoealáhusa, mii dál vásiha stuorra guohtunroasu. 

– Mii bivdit ipmárdusa álbmogis, go dál sáhttet skohterláhttut giddejuvvot, muhto dat ii dahkko bahávuođain. Boazu ii gierdda dál muosehuvvat heajos guohtuma geažil. Dál lea ain dievas dálvi, ii ge gávdno ii bievla dielku ge. Dál lea nu borga ahte in oainne ránnjáviesu ge, lohká Hans Isak Olsen.  Kárášjoga gielda ja Guovdageainnu suohkan leat gergosat geahččat dieđuid mat bohtet boazoealáhusas, ja jus dárbu de giddejit skohterláhttuid. 

– Boazoealáhus dieđiha njuolga stáhtahalddašeaddjái, muhto jus váldet minguin oktavuođa de mii leat gergosat geahččat čovdosiid. Dál vuos ii leat oktage skohterláhttu giddejuvvon, lohká Hans Isak Olsen. 

Roasus stuorra váikkuhusat

Leamašan erenomáš garra dálvi boazodoalloealáhusas. Dálkkádat dilálašvuohta árra dálvvi lea dagahan ahte stuorra oassi guohtoneatnamiin leat lohkkaduvvon ja boazosápmelaččat leat ferten biebmat ealuideaset eastadan dihte ahte bohccot eai jámat. Guohtondilálašvuohta lea ain heittot ja olusat leat válljen johttát árabut go lávejit geasseorohagaide, čálliba Kárášjoga gieldda ja Guovdageainnu suohkana sátnejođiheaddjit Svein Atle Somby ja Hans Isak Olsen oktasaš preassadieđáhusas. 

– Guohtonroassu lea čuohcan garrasit guktot gielddaide. Dákkár roasus leat stuorra ekonomalaš váikkuhusat, seammás lea maid fysalaš ja psyhkalaš noađđi čuožžut dákkár váttes dilis guhkit áigge, lohkaba sátnejođiheaddjit.  

BIVDIBA IPMÁRDUSA ÁLBMOGIS: Guovdageainnu sátnejođiheaddji Hans Isak Olsen ja Kárášjoga sátnejođiheaddji Svein Atle Somby.  Vuorkágovva: Iselin Skum ja Biret Inger Eira
BIVDIBA IPMÁRDUSA ÁLBMOGIS: Guovdageainnu sátnejođiheaddji Hans Isak Olsen ja Kárášjoga sátnejođiheaddji Svein Atle Somby.  Vuorkágovva: Iselin Skum ja Biret Inger Eira

Elliidčálggus sáhka  

Dákkár guohtonroasus lea dárbu ásahit liige doaimmaid mat sáhttet guoskat eará beroštanjoavkkuide. 

– Dás lea sáhka elliidčálggus. Vaikko boazodoalloealáhus biebmá bohccuid beaivválaččat, de dárbbahit bohccot dál guohtonráfi  dain guovlluin gos vel lea guohtun. Mii bivdit dan sivas buohkaid geat vánddardit luonddus váldit vuhtii bohccuid. Mii dáhttut áddejumi ahte eaŋkal guovlluin lea dárbu giddet skohterláhttuid. Mis lea luohttámuš ahte boazoealáhus ovttas gielddain gávdnet buori čovdosiid.  Leat guovllut gos eai leat bohccot maid buohkat sáhttet geavahit, čálliba Guovdageainnu suohkan ja Kárášjoga gielda.   

Vásihit vaši, dohkketmeahttun

Svein Atle Somby ja Hans Isak Olsen leaba maid registreren heajos beaggima ja vaši boazoealáhusa vuostá, erenomážit sosialamediain. 

– Leat dohkketmeahttun dagut. Buorre gulahallan ja áddejupmi lea čoavdda mo servodat   sáhttá doarjut min boazosápmelaččaid dán guohtonroasu čađa, čálliba sátnejođiheaddji guovttos. 

Hans Isak Olsen muitala ahte olu boazosápmelaččat leat dál balus go galget johttát. 

– Sii vásihit unohisvuođaid, go verbálalaččat daddjo feara mii.  Sii leat balus go dál leat johtimin mearragáddái, dadjá Olsen.

-Almmuhus-