-Almmuhus-
SMÁVVAOĐĐASAT SÁMIS– Mii ávžžuhit eambbosiid váldit boahkuid

– Mii ávžžuhit eambbosiid váldit boahkuid

-

-

Guovdageainnu álbmogis lea ain oalle unna oasáš boahku váldán, earenoamážit nuoraid ja nuorra rávisolbmuid gaskkas.

Norga lea dál rahpagoahtán servvodaga. Dat lea danne go ollugat leat boahkuid váldán Norggas. 

– Vai mii Guovdageainnus maid galgat oadjebasat leat go Norga fas rahpasa, de ávžžuhat álbmoga boahkuid váldit, čállá suohkan iežaset neahttasiidduin.

Norgga dearvvašvuođaeiseválddit leat mearridan heaittihit Covid-19 boahkuheami golggotmánu 10. beaivvi 2021 rájes.

– Jos mii galgat olahit 90 proseantta boahkuhangokčandássemihtu, de ferteše eambbosat váldit boahkuid boahttevaš golmma vahkku, čállá suohkan. 

40 proseantta ássiin sáhttet oažžut koronadávdda

Guovdageainnu suohkana sátnejođiheaddji, Hans Isak Olsen, lohká leat balddihahttin go Guovdageainnus leat dušše birrasii 60 proseantta álbmogis geat leat boahkuid váldán. 

– Dál rahpasa máilbmi eambbo ja olbmot johtigohtet eambbo, maiddái Guovdageidnui. Mis lea ain 40 proseantta ássiin geain lea vejolašvuohta oažžut koronanjoammuma ja šaddat duođai buohccin. Mun bealistan gal háliidivččen ahte eambbosat váldet boahkuid, dadjá Olsen.

Golbma vahkku vel boahkuhit

Sátnejođiheaddji ii loga suohkanis makkárge earenoamáš strategiija mainna lágiin galget eambbosiid oažžut boahkuid váldit. Sii leat guhkidan «Drop-in» -áiggiid ja muittuhit ahte Norggas heitet boahkuheames 40. vahkku.

– Boahkuheapmi lea eaktodáhtolaš. Son guhte ii áiggo dan váldit, ii váldde dan. Muhto mii geahččalit ávžžuhit buohkaid váldit boahkuid, ja muittuhit ahte son gii áiggošii boahkuid váldit ferte dál dan dahkat, dadjá Hans Isak Olsen. 

Guovdageainnu suohkan ávžžuha buohkaid geat leat badjel 12-jahkásaččat váldit boahkuid. Boahkuheapmi lea LES-viesus iige leat dárbu diŋgot áiggi ovdagihtii. 

-Almmuhus-