Čuvgesrukses ja sáhppesalit nr 666 leat várra máŋggas juo álgán dovdat, vel Ruoŧas ge. Go son vuittii silbba mannan váhkoloahpa Bihttánis, dál sus lea mihttu beassat golmma buoremusaid searvái olles Ruoŧa cupas.
Čuvgesrukses ja sáhppesalit nr 666 leat várra máŋggas juo álgán dovdat, vel Ruoŧas ge. Go son vuittii silbba mannan váhkoloahpa Bihttánis, dál sus lea mihttu beassat golmma buoremusaid searvái olles Ruoŧa cupas.
Guovdageaidnulaš Niillas Jovnna Länsman mearridii giđđat lonuhit BRP-skohtermearkkas ja Polaris merkii, go son jáhki birget dainna buoremusat čáhcecrossas.
Nu orru ge maid, go son vuittii mánnán váhkoloahpa Bihttánis visot golbma rátkkavuoddjiima, ja beasai njuolga finálii. Doppe son lei centimehteriid eret vuoittit olles gilvvu.
Dál son lea goalmmádin Ruoŧameasttirgilvvus čáhcecrossas, go guokte oassegilvvu vel leat báhcan.
Ii hárjánan vel
Länsman muitala son guokte mánu áigi mearridii lonuhit Polaris skohtermerkii, go son lei vuohttán Norgga buoremusaid válljen dakkára ja maid birgejit hui bures dainna skohtermearkkain.
Son lea guovtti mánus huksen ja heivehan skohtera nu go son háliida dat galgá leat.
– Mun lean bargan dál daid mánuid oažžut skohtera nu go mun áiggun. In leat riekta hárjánanvuoddjit dainna, muhto mun oainnán čielgasiid ahte dá lea buoremus skohter go čázi galgá vuoddjit, muitala son.
Ferte vuoitit
Son lea dál goalmmádin Ruoŧa čáhcecrossacupas. Golbma váhku áigi son šattai gávccádin go vuosttaš Ruoŧacupgilvu lágiduvvui Storuman:s, Davvi-Ruoŧas. Doppe son vuojui go dagai boastavuođu. Mannan váhkoloahpa lei nubbi oassi cupas, ja son lei nu lahka vuoittit, ja šattai nubbin.
– Jáhkán jus galggan golmma buoremusaid searvái beassat, de ferten goit ovtta dain cupain vuoittit, ja jáhkán dán vahkkoloahpa sáhtán nagodit dan go lea nu buorre dovdu mus, lohká son.
Govven: Alice Balto
Buoremus fas mielde
Okta dain májilmmi buoremus čáhcecrossavuddjiin, Deatnulaš Morten Blien, galgá fas mielde dál Ruoŧa cupas mii lágiduvvo Kalix:s dán vahkkoloahpa . Son ii lean Bihttánis mielde go lei Májilmmimeasttirgilvvuin Amerihkás.
– Lean oaidnán son ii leat birgemeahttun, ja dál lea vel mus seamma lágan skohter go sus. Visot lea vejolaš, lohká Länsman, ja lasiha vel:
– Dál lean heivehan skohtera daid maŋemus beivviid, dál vuolgá maid hui bures mu skohter.
Buoremusaid searvvis
Länsman muitala ahte buorre vuolgga mearkkaša birrasiid 70 proseantta olles gilvui.
– Buorre vuolgga mearkkaša ahte leat ovddemusas, it ge čáhcehevrro siste.
Dán vahkkoloahpa lea goalmmát oassi ruoŧacupas, ja lágiduvvo Kalixas, Davvi-Ruoŧas. Gaskaváhku fas loahpahuvvo Ruoŧacupa Lyckseles Ruoŧas.
– Doppe leat dat buoremus vuoddjit, danin mun háliidan maid searvat ruoŧacupii, lohká Länsman vel, ovdal vuoddjá tuvrii mii bistá váhku.
Tuvra manna Kalixii vahkkoloahpa, Gaskaváhku loahpahuvvo Ruoŧacupa Lyckseles, ja vahkkoloahpas fas lea čáhcecrossa Avvilis Davvi-Suomas.
