-Almmuhus-
-Almmuhus-
OĐĐASATNRK guldaleaddjilogut: – Mihtideamit eai leat dušše sámegielagiid gaskkas

NRK guldaleaddjilogut: – Mihtideamit eai leat dušše sámegielagiid gaskkas

-

-

NRK mediadutki oaivvilda ahte logut maid son attii Ávvirii eai atte duohta gova áššis. 

Ávvir lea dán vahkku almmuhan guokte ášši NRK Sámi guldaleddjiidloguid birra ja nuorra guldaleddjiid birra. Maŋŋel go vuosttaš ášši almmuhuvvui, de válddii NRK mediadutki Tor Eide fas oktavuođa Ávviriin ja čilgii loguid. 

Eide čilge ahte elektrovnnalaš rádiomihtideapmi mii mis lea Norggas ii álo doaimma nu bures go mihtida smávva kanálažiid nu go NRK Sámi loguid. 

– Jus geahččá loguid maid adden didjiide, de lea diein loguin boasttuvuohta dat ahte NRK Sámi mihtideamit eai leat dušše sin gaskkas geat hálddašit sámegiela, muhto olles Norgga álbmoga. Nu ahte ii leat sihkar ahte logut čájehit dan duohta guldaleami sin gaskkas geat hálddašit sámegiela, dadjá son. 

Proseanta lassánan davvin

NRK Sámi guldaleaddjilohku obbalaččat Norggas lea njiedjan gaskamearálaččat 13.000 guldaleddjiin juohke mánu 2019:s gitta 2020 rádjai.

2019:s ledje 44,6 proseantta guldaleddjiin Davvi-Norggas ja jagi maŋŋel fas leat 46,6 proseantta guldaleddjiin Davvi-Norggas. 

Ávvir jearrá Eides lea go de nu ahte 44,6 proseantta 50.000 guldaleaddjis mearkkaša ahte 2019:s ledje Davvi-Norggas 22.300 guldaleaddji ja jagi maŋŋel fas 17.242 guldaleaddji, ja ahte NRK Sápmi massii 22,68 proseantta guldaleddjiin davvin? 

– Dál seaguhat gokčama ja dan maid mii gohčodit profiila proseanttain. Diet rehketbihttá ii šatta de riekta go profiila proseanttas rehkenastojuvvo kanála ratingas ja ratinga lea dat mii muitala man oallugat leat leamaš kanálas ja man guhká sii leat guldalan. Danne ii sáhte geavahit dan proseantta vuođđun go rehkenastá rievdama gokčamis Davvi-Norggas, dadjá Eide. 

– Ja de lea maid dehálaš muitit ahte dákkár mihtidemiin leat boasttuvuođaoasit. NRK Sámi mánnosaš gokčan 2019:s lei 50.000 guldaleaddji, dán jagi gaskamearálaš mánnosaš gokčan lea 37.000, dát erohus ii leat hirbmat stuoris, ja statistihkalaččat ii leat erohus dásis mii lea mihtiduvvon 2019:s ja 2020:s, lasiha son. 

Ávvir jearrá Eides rating loguid birra ja čujuha rating loguide maid Nielsen Media Research almmuha mánnosaččat, gos NRK Sámi lohku lea 0 maŋemus vahkkuid. 

– Dábálaččat lea beaivválaš gokčan, muhto unna kanálažiidda nu go NRK Sápmái berre geavahit vahkkosaš dahje mánnosaš gokčama vai oažžu nu ollu dieđuid go vejolaš. Dat lea maid oahpes ášši ahte unnit kanálaid logut eai almmuhuvvo danne go dáin loguin ii leat ollu ávki. Ovdamearkka dihte Dánmárkkus eai oba almmut ge smávimus kanálaid loguid, muhto bidjet daid oktii dakkár oktasaš «earát» suorgái, čilge Eide. 

Logut čihkosis

– Go logut leat nu čihkosis ratinga duohken, mo de sáhttá kanála geavahit dáid loguid ovdamunnin? Go logut eai gávdno, mo de sáhttá statistihka geavahit buoridit fálaldaga? Go 2019 logut leat ođđaseamos logut mat dis leat, mo de áigubehtet geahččat vássánáiggi loguid ja geahččat mii áiggi čađa lea doaibman rádios ja mii ii? jearrá Ávvir.

– Die leat buorit gažaldagat, muhto smávva kanálažiidda ii leat riekta dákkár guorahallan. Mii geahččalit čađat mihtidit NRK Sámi fálaldagaid sápmelaččaide buoremus lágiid mielde ja mii geahččalit iešguđet vugiid. Muhto panelamihtidemiin ja jearahallanskoviin šaddá dát hui váttis go sámi álbmot lea statistihkalaččat dan mutto unni go lea, vástida Eide. 

– Jus mihtida boastut ovtta proseantta panelamihtideamis olles Norgga álbmoga gaskkas, de lea dát badjel 40.000 guldaleaddji mat mihtiduvvot boastut. Dat mearkkaša ahte šaddá váttis mihtidit áibbas riekta go Norggas eai leat go gaskkal 50.000 ja 80.000 sápmelačča. Ja mis ii leat maid vejolašvuohta rekrutteret sápmelaččaid dákkár mihtidemiide. De berre baicca geavahit fokusjoavkkuid ja čiekŋalit jearahallamiid guldaleddjiin gávdnandihte máid guldaleaddjit háliidit, ja hupmat guldaleddjiiguin, vástida Eide.  

– Lehpet go mihtidan guldaleddjiid ovdal go 2019:s? 

– Jus lea mihtiduvvon, de leat dieđut láhppon. Gosa dat leat šaddan, dan gal in dieđe, vástida Eide.

Mihtiduvvot dárkilit

Ávvir váldá oktavuođa Kyrre Dahlain gii jođiha radionytt.no neahttabáikki. Dát neahttabáiki čuovvu guldaleaddjiloguid ja čállet maid áššiid rádiosuorggi birra. Sii leat ovdal čállán NRK Sámi ja njealje eará NRK kanála guldaleaddjiloguid birra.

Dahl čujuha almmolaš loguide maid Nielsen Media Reasearch almmuha. 

Son čilge ahte logut dán siiddus mihtiduvvojit duháhiid mielde ja doppe oaidná ahte 37. vahkku rájes dán jagi leat NRK Sámis leamaš gaskkal vuollel 1000 ja 5000 guldaleaddji vahkkosaččat. 

– Sáhttá leat veaháš váttis dulkot dáid loguid, muhto vuosttaš logut dás muitalit guldaleddjiidloguid duháhiid mielde, dadjá Dahl.

Logut maidda Dahl čujuha čájehit ahte juohke vahkku, vahkku 37 rájes leat leamaš vuollel 5000 guldaleaddji ja dasa lassin leat vel vahkkuid 37, 38 ja 44 leamaš nu unnán go vuollel 1000 guldaleaddji gaskamearálaččat juohke beaivvi. 

Eide NRK:s duođašta ahte logut maidda Dahl čujuha dollet deaivása. 

– Dat lea riekta ahte PPM-logut čájehit vuollel 1000 muhtin vahkkuid, muhto de lea fas sáhka beaivválaš mihtidemiid birra. Ja nu go namuhin, de lea nu ahte dákkár mihtideamit eai atte dan duohta gova NRK Sámi guldaleamis. Logut eai muital mo diŋggat doibmet ja prográmmafálaldaga birra, dadjá Eide.

-Almmuhus-