-Almmuhus-
SMÁVVAOĐĐASATMiellahtto­lohku lassánan Norgga bivdo-ja guolástus­lihtus 

Miellahtto­lohku lassánan Norgga bivdo-ja guolástus­lihtus 

-

-

Jagi 2021 ávvudii NJFF, dahje Norgga bivdo- ja guolástuslihttu, 150 ávvujagi ja miellahttologu lassáneami. Olgodaddan, bivdu ja guolásteapmi oažžu stuorát beroštumi go goassege ovdal. 

Jagi 2021 loahpas ledje Norgga bivdo- ja guolástuslihtus oktiibuot 116.120 miellahtu. Go 6.070 olbmo dieđihedje iežaset miellahttun, de lea lassáneapmi 5,5 proseantta. Nu lea NJFF beassan Norgga stuorámus ja eanemus ealás olgodaddanorganisašuvdnan, čállá NJFF preassadieđáhusas. 

– Ávvujahkái leat mii vuoruhan čalmmustahttima ja somás doaimmaid. Miehtá riikka leat mii lágidan ávvudoaluid olgun ja guossohan olbmuide luondduburiid. Mii leat vuoruhan borramuša maid mii leat gohčodan «vill mat», dahje meahcceborramuš, dan dihtii go mii bivdima ja guolásteami bokte doalahit árbevirolaš luonddu ávkkástallama. Mii geavahat báikkálašburiid, mat leat vižžon das lahkosis ja mii ii leat páhkkejuvvon, čilge NJFF organisašuvdnahoavda Knut Erik Risvik. 

Son muitala lihtu maid lágidan kurssaid ja doaimmaid iežaset miellahtuide, sihke báikkálaččat ja digitálalaččat. Stuorámus lassáneapmi lea Hedemárkkus, Davvi-Trøndelagas ja Hordalánddas. 

– Jagi 2021 lihkostuvaimet bures bearašmiellahtuvuođain. Dál leat mis 12.000 bearašmiellahtut, lohká Risvik.

-Almmuhus-