Sámediggepresideanta rámida boazodoallokonferánssa lágideddjiid.
– Miellagiddevaš ja dehálaš konferánsa. Ferten rámidit lágideadjiid, dadjá sámediggepresideanta Silje Karine Muotka. Dán vahku lágiduvvui Guovdageainnus guovttebeaivásaš fágalaš konferánsa boazodoalu árbevirolaš máhtu birra rievddadeaddji servodagas. Olu boazosápmelaččat, dutkit ja ásahusaid ovddasteaddjit ledje vuoruhan konferánssa.
Duođalaš hástalus
Silje Karine Muotka lohká ahte dakkár fágalaš konferánsa lea dehálaš go galgá hábmet boahtteáiggi politihka.
– Bohte olu buorit ovdamearkkat maid sáhttá aktiivvalaččat geavahit rievdadit boazoealáhusa dili. Mun oaivvildan ahte mis leat duođalaš hástalusat, nu go goavvejagit, dálkkádatrievdamat mat sihke hehttejit ja hástalit min ovddas guvlui, dadjá Silje Karine Muotka guhte čuovui konferánssa. Son lohká dál leat dehálažžan diehtomielalaččat geavahit gelbbolašvuođa mii bođii ovdan konferánssas.
