-Almmuhus-
-Almmuhus-
MAGASIIDNAMielde TV-ráiddus «Jakten på nordlyset»

Mielde TV-ráiddus «Jakten på nordlyset»

-

-

Karen Margrethe Kemi Nyheim ja Roar Nyheim leaba mielde TV-ráiddus «Jakten på nordlyset» mii sáddejuvvo odne TVNorges.

Odne, ođđajagimánu 2. beaivvi, sádde ge TVNorge vuosttaš oasi ráiddus «Jakten på nordlyset», dahje man sámegillii sáhttá dadjat, «Guovssahasaid bivdaleapmin».

Guovdageaidnulaš Karen Margrethe lea okta váldoolbmuin dán ođđa TV-ráiddus. Son doaimmaha fárrolaga isidiin Roariin sámi turistafitnodaga «Lyngsfjord Adventure» Báhcavuonas, Romssa fylkkas.

 


LIIKO ČÁJEHIT: Karen Margrethe liiko čájehit turisttaide sámi kultuvrra. TV Norge preassagovva

Guovssahasat geasuhit

Romssas lea ge dálveturisma hirbmadit lassánan, ja olbmot miehtá máilmmi bohtet geahččat guovssahasaid.

Turisttat geat bohtet valvin Romsii muosáhit guovssahasaid leat máŋggageardánit laskan maŋemus jagiid.

Guovssahasaid turisma lea ge šaddan doaibma mainna dinejit miljovnnaid, ja Romsa lea ge ovtta láhkái šaddan ođđaáigásaš Klondike.

Ii goste eará sajis Norggas lassan turistaealáhus seamma jođánit. Viđa jagis lea ge ruhtajorru dan ealáhusas lassanan 90 miljovnna ruvnnos 500 miljovnna ruvdnui.   
 

 

Sámi kultuvra

Karen Margrethe doaimmaha ovttas isidiin Roar Nyheimain Lyngsfjord Adventure turistafitnodaga mas fállaba sámi aktivitehtaid main lea guovddážis čájehit sámi kultuvrra olbmuide geat bohtet miehtá máilmmi.

– Turisma, ja olbmot geat bohtet miehtá máilmmi, addet erenoamáš vejolašvuođa čájehit sámi kultuvrra, dadjá Karen Margrethe TVNorge preassadieđáhusas ja joatká:

– Juste kulturčájeheapmi lea hirbmat dehálaš munnje, go olbmot dan stuorra máilmmis eai dieđe álot nu ollu sámiid birra.  

 

Buolli beroštupmi

Discovery Networks prográmmahoavda Sverre Nordbø lohká preassadieđáhusas, ahte «Jakten på nordlyset» TV-ráiddus oahpásmuvvat olbmuiguin geain lea buolli beroštupmi dasa mainna barget.

– Sii leat olbmot geain lea vuolgga, áŋgiruššan ja mokta, ja lea ge gelddolaš čuovvut sin mielde, dadjá Sverre Nordbø.

 

Veahá balus

Odne eahkes de vuohččan oidnogohtet dat maid leat álgán juo filbmet jagi dás ovdal.

Karen Margrethe dadjá ahte lei hui somá bargat go kámerajoavku čuvodii čađa gaska, ja álggus lei gal veahá eahpádusas mot dat ges šaddá.

– Muhto manai hui bures. Ferten gal mieđihit ahte lean veahá balus ovdal go vuosttaš oassi sáddejuvvo, go dábálaččat in liiko iežan oaidnit filmmain, dadjá Karen Margrethe Kemi Nyheim.

-Almmuhus-